Kovara almane „Öko-Test“ hûmara xoya newîye de 34 produktê kozmetîkî yê tebîî kontrol kerdî. Nê markayê kozmetîkî jê (sey) tebîî yenê rotenê. Labelê skorê testê “Ökö-Test”î musneno ke hema-hema pêro nê produktê tebîetî rastîye de kokteylê kîmyewî yê.

Dikanan de xeylê markayê krem, şampuan û losyonan binê nameyê “tebîî” de yenê rotene. Serê ambalajê nê produktan de zafane resimê meywe, vaş û vîlikan estê. Labelê zereyê nê çîyanê kozmetîkan de nê malzemeyî çin ê, hetta boya înan kîmyewî yena viraştene. Testê kovare ra gore 15-60% yê nê malzemeyanê kozmetîkan viraşte yê. Nînan ra tayê kî seba weşîya însanî rind nîyê. Tayê produktan de madeyê formaldehîdî esto ke rîskê qenserî keno zêde. Aye ra kî dot madeyê rengdayoxî, rûnê petrolî û madeyê jê (sey) klorfenesînî tede r’ ê.

Markayê ke tede tewr zêde madeyê kîmyewî estê Garnier, Schwarzkopf û Henkel ê. Markayê ke testê kovare de notêde rind girewto, nê yê: Yves Roches û The Body Shop. “Ökö-Test” pêşnîyaz kena: herînayox/e ke wazeno/a çîyêde kozmetîkî yo weş bicêro, ambalaj ser o sertîfîkaya Ecocert ya kî Natrueyî ra bifetilîyo.