Înstîtutê Ziwan û Kulturê Kirmancan (ÎKK) o ke Berlîn der o, sey her serre emser kî ancîya panel û Şahîya Kulturê Kirmancan organîze kerde.

Şahîya Kulturê Kirmancan a 5. ke hetê komîteya Înstîtutî ra amebî organîzekerdene, hîrê rojî dewam kerd. Nê hîrê rojanê kulturî ra roja înîye, 16.11.2018 bi panelan dest kerd ci. Bi pêşkêşkerdena Pinar Ozgule programî saeta 19:30 de dest kerd ci. Destcikerdena nê panelî de Pîr Sey Riza serrgêra 81. de bi hurmet ame yadkerdene. O ra dime panelîstan sahne de cayê xo girewt û “Dêrsim 37-38” ser o hîra-hîra qese kerd. Panelîstan mîyan de cigêrayox û nuştox Munzur Çem, sosyolog Îsmaîl Beşîkçî, cigêrayox û tarîxnas Mehmet Bayrak û Cahît Munzur bî. Serekê enstîtu, Lerzan Jandil, moderatorîye kerde.

Roja dîyine, 17.11.2018 de, konser estbî. Hunermendanê sey Beser Şahîn û Pinar û Îmam Ozgulî hunerê xo pêşkêşê meymanan kerd. Roja hîrêyine, 18.11.2018 de, şahîye bi tîyatro dewam kerd. Bi pêşkeşkerdena Pinar Ozgul û Wusênê Gestemerdeyî ra, programî saeta 15:30 de dest kerd ci. Kaybazê tîyatroyê kirmanckî Arêyê Kayî vejîyayî sahne û kayê xo kay kerd. Program bi mîkrofono rakerde û werdê Kirmancîye qedîya.

Goreyê viraştoxanê şahîye, her hîrê rojî bi eleqeyêda zaf rinde vêrdî ra. Endamê ÎKK Wusênê Gestemerdeyî naye ser o va “Hetê miletê ma ra raşta kî alaqeyêda zaf rinde bîye û xeylê kesî beşdarê nê hîrê rojanê kulturî bîyî. Şahîya Kulturê Kirmancan ebe rengê zonê kirmanckî û ebe rengê muzikê kirmanckî vêrde ra. Kirmancan kî ebe na wesîle şahîyêda zaf rind û delale derbaz kerde.”

3 ŞÎROVEYÎ

  1. Dest û payê organîzatoran medejê. Ez tîya ra mamosta Lerzan Jandîl, Munzûr Çem, Wusênê Gestemerde, Îbrahîmê Xaşxaşe, Pinar û Îmam Ozgul û Grûba Areyê Kayî tek-tek pîroz kena û silamanê xo yê germinan rusnena kedkaranê kirmanckî. Rind ke kedkarê nîyanênî estê.

  2. Weş û war be, Ugur Sermîyan. Bi na wesîle ma kî zere û can ra to re sêlamanê xo yê germinan ruşnenîme. Rind ke dost û hevalê zê şima kî estê.

  3. Uğur bira, emegdaranê ziwan/zon ê kirmanckî ra yew/jû yî kî tîya. Zerîya ma de, eşqê zonê ma, eşqê kulturê ma ke çînebîyêne zonê ma wo vilê çewt, zonê ma wo bêkes û bêwayîr game rawer nêşîyêne.

    Maşiqanê zonê Xizirî, emegdaranê zonê Xizirî bi sebrê dewreşîyenî hama bi hetkarîya xizirî gam bi gamê warê zonî de xebatê xo kerd. Çiqas kemasîya xo est bo kî, bêşik ma nika merhelayê de rind derîme.

    Seba kê bi imkananê şenikan, warê zonê ma de gamê hewlî eşte, ez şexse to de peruyîne emegdaranê zonê ma fîraz kena şima peruyînan bi silamanê germînan silam kena.

    Rind ke şima xizmetkarê na xêzna ma, xizmetkarê kamîya ma este.

CEWAB BIDE

Keremê xo ra şîroveyê xo binuse
Keremê xo ra nameyê xo binuse