Raporê kongrayê DYA ra gore par dinya de hîrê çekan ra yew hetê DYA ra amey rotene. Xebera rojnameyê New York Timesî ra gore DYA bi hûmara 66,3 mîlyar Dollaran cayo yewin der ê, înan ra dime Rûsya  4,8 mîlyar Dollarî çekî rotî.

Pîyaseyê çekanê dînya serra 2011 de 85,3 mîlyar Dollarî bî. Amerîka bi para 75% no sektor de hema-hema monopolîst o. No rapor ra gore DYA serra 2010 de 21,4 mîlyar Dollarî çekî rotî. Semedê herbê newe yê Afrîkaya Vakurî û krîzê Îranî ra dewletê ke o dorme der ê, çekan herînenê. Ekonomîya çekan kî musnena ke Rojhelato Mîyanên de jeopolîtîka têduştîye ra rolêde girs kay kena. Bitaybetî welatê sey Erebîstanê Seûdî, Umman û Mîreyîyê Ereban ke cengê bi Îranî ra tersenê, serra 2011 de zaf çekî herînay. Cografyayê bînî yê dinya herînayîş peyser şî.

Erebîstanê Seûdî sirf DYA ra 84 tene jetê F-15 û nêzdîyê 200 tene helîkopterê Apache û Black Hawkî girewtî, fîyatê nînan 33,4 mîlyar Dollarî yo. Projeyê bînî mabênê ereban û amerîkanijan de sîstemê seveknayîşî yê fuzeyan o. Mîreyîyê Ereban kî butçeyê xo ra 3,49 mîlyar Dollarî fuzeyan rê xerc kenê, nêzdîyê 1 mîlyar Dollarî kî helîkopteranê Chînookî rê şîy. Welatêde bîn ê ereban Ummanî seba 18 tene F-16 jetan rê 1,4 mîlyar Dollarî rusna DYA.

CEWAB BIDE

Keremê xo ra şîroveyê xo binuse
Keremê xo ra nameyê xo binuse