Cemîyetê Rojnamegeranê Başûrê Rojhelatî (GGC) dest kerd ci ke Dîyarbekir de rojnamegeran rê dersa kurdkî bido. Serekê GGC Faruk Balikçî naye ser o da zanayene ke kurdkî êndî bîyo zonêde (ziwanêde) muhîm û gerek rojnamenusî kî kurdkî bimusê.
Kursê kurdkî lokalê GGC de ca cêno. Balikçî ra gore Dîyarbekir ju (yew) merkezê weşanê kurdkî yo û xeylê rojnamegerî kurdkî nêzanenê, coka kursê kurdkî ju (yew) îhtîyaç o. Xora, xeylê mîtîng û pêserameyîş nika bi kurdkî yenê viraştene, gerek muhabîrê rojnamegeran naye teqîb bikerê. Redaktor û rojnameger ke kurdkî nêzanenê, karê înan ê rojnamegerîye beno daha zor.
