Çimeyanê cîya-cîyayan ra gore ewro mabênê cengdaranê Partîya Karkeranê Kurdîstanî (PKK) û Partîya Demokrat a Kurdîstanî yê Îranî (PDK-Î) de pêrodayîşêk vejîya. Sey netîce tewr tay yew pêşmergeyê PDK-Î canê xo da.

Goreyê keyepelê PDK-Î ra, gerîlayê PKK hêrema Keleşînî ya Kurdîstanê Rojhelatî de hêrişê pêşmergeyanê PDK-Î kerd. Ney ra gore di pêşmergeyî pêrodayîşî de canê xo dayî. Xeberanê Rûdaw û BasNewsî ra gore PDK-Î vana ke gerîlayanê PKK na pêşmergeyan ra ke mintiqaya xo ra nêvîyarê. Dima, xebera bîn a Rûdawî de ame dayene zanayene ke beno ke Pasdaranê Îranî kewtî kincê PKK ke hêrişê pêşmergeyan bikerê. Hetkarê Serekê Pêroyî yê PDK-Î Musfata Mewlûdî BasNews rê da zanayene ke partîya xo de dişmenîya duştê PKK yan partîyêda kurda bîne de çin a. “Hêzanê PDK-Î çîyêko xelet nêkerd. PKK vana qey a mintiqa de tena a esta û keso bîn rê destûr çin o ke uca ra bivîyaro. Labelê hêzê ma PKK de qet dişmenîye nêwazenê. Ma nika pê temsîlkaranê xo ceribnenîme ke na mesele hel bikerîme, çike bawerîya ma ya pêt a ke kurdî caran yewbînan de pêro nêdê.”

PDK-Î: Ma çîyêko xelet nêkerd

Duştê nê melumatî de vilaweka PKK esta ke FiratNews ser o ameye weşanayene. A vilaweke ra gore Merkezê Çapemenî yê Hêzanê Seveknayîşê Şarî (HPG) vano ke xeberê ke hetê KDP-Î ra bîyê vila, xelet û nîyetxirab ê. Goreyê PKK ra, gerîlayanê HPG ardimê xo pêşkêşê grûbêda 15-20 pêşmergeyan kerd ke waşt Xinêre ra bikewê Rojhelatê Kurdîstanî. Çi esto ke grûba pêşmergeyan sînor nêvîyart û Xinêre de vindete. Xinêre de xora hêzê HPG zaf ê. “Vizêr şan saeta 17:00 de hêzêkê PDK-Î Dîyana ra bi 7-8 wesayîtan ame, warê Berbizina de ca girewt. Vera saeta 09:00 ya şodirî de, seba ke bizanê ke armancê pêşmergeyan çik o, grûbêka hêzanê ma yê herêmanê Berbizina û Xinêre şîye înan het. Bi hêzê pêşmergeyanê 60-70 kesan kombîyayîşêk virazîya û ê cayê ke ci ra ameyî, cêrayî ra uca. Xinêre de kî, wexto ke hevalê ma seba kombîyayîşî şîyî, tey vet ke grûbêda pêşmergeyan peyê înan de dizdî ya nêzdîyê ma bîya. Ney ser o înan rê ame vatene ke ganî nêzdîyê hevalanê ma nêbê, la înan goş ro ser nêna. No hêzê ma kî seba armancê îqazkerdişî gule na pira. Uca têkewtişê 3-4 qewimîya. Esnaya nê têkewtişî de yew pêşmergeyî canê xo da, yewêk kî bîyo birîndar.”

HPG: Grûbêda Pêşmergeyan Dizdî ya nêzdîyê ma bîye

Raporê HPG ra gore fermandarê gerîlayan ca de kewt mabên û fermandarê pêşmergeyan de ame têlewe. Pêşmergeyo dirbetin ame berdene nêweşxaneyê gerîlayan, pêşmergeyanê bînan xo ant peyser. Kombîyayîşê çareserkerdişî mabênê PKK û PDK-Î de hîna dewam kenê. Vilaweka xo de HPG giranî dana ser ke partîya xo qet nêwaşt pêşmergeyan de pêro bidê, labelê piranayîşê îqazî o wext mecburî bî. Şehîdkewtişê yew pêşmergeyî kî çîyêde zaf xemgîn o. HPG do ney ser o cigêrayîşo rakerde biramo.

No mabên de Parlamentoyê Herêma Federal a Kurdîstanî ra fraksîyonê parlamentaranê PDK her di partîyî kerdî baldar û îqaz kerd ke wextê cengê duştê terorîstan de cengê birayan netewe rê îhlal o. Kombîyayîşê parlamenteranê Herême de pêrodayîş ame şermezar kerdene. “Ma bale ancenîme ser ke Kurdîstan de her tewirê problemê sîyasyî bincaran bi çekan nênê çareser kerdene. Tawo ke şarê ma cengê duştê terorîstan de gonîya xo rişneno, o taw de kurdan mîyan de gonîrişnayîş netewe rê îhlal o. Dişmenîya nîyanêne tarîxo tewr tarî yê Kurdîstanî de darîyaya we. Şaro kurd tekrarkerdişê nê tarîxê tarîyî rê caran destûr nêdano.”

Parlamentoyê Herêma Kurdîstanî: No Netewe rê Îhlal o

Nê rojanê peyênan de hûmarêk pêşmergeyê PDK-Î cêrabîyî ra mevkîyanê xo yê kanan ê Kurdîstanê Rojhelatî. Çend serrî yo ke tayê nê cayî binê kontrolê PKK der ê. Melumatê PDK-Î ra gore racêrayîşê pêşmergeyan semedê protestoyanê peyênan ê Mehebadî ra seba rejîmê Îranî îqaz bî. Serebûtê Keleşînî ra dima artêşa Îranî hêzê xo a mintiqa de kerd tenêna pêt.

5 ŞÎROVEYÎ

  1. Pkk ke siyo kot uska huskno, kerdo xirabin. Nika ney Kurdistan ra netexeliyay? Nika ney dewa çinay virazene kes fehm nikeno. Pkk bi se tere dev-sol, harekete xo, siyaseta xo, ideolojiye xo, qiseye xo, medyaye xo bi se tere dev-sol, perincek. Partiya bdp berd kerd hdp, teslime tirkan kerd, medyaye xo da ajane tirkan, sere firatnews biwane, zere sima dezeno. Bakur de her ca kerd deste eskere tirkan, her milet azado, inan milete kurd kerd tirk, rejil kerd. 30.000 cenci koyande qirr kerd, nika vane Tirkiyalilesmek, kurdistan erzene çop. DEF BERE SERE KURDISTAN RA, SERE TIRKIYAYE XO ANKARA YE XO.

  2. Yahuu ni aqılsıvık key fam kene???? Haq kena derde sımawo bîn çıno hevalene? no kaye domanu niyo ke. teröristê İŞİD nawo vere çeverê sıma, sımak jumin de uğraşmıs bene tewww kırmance ma qe baqıl nibene

  3. Nabe xwîna kurd bi destê kurd were rijandin, lê guh nêdin Rûdawê, ev kanala AKP ya fîtker e û dijminê kurda ye. Bijî PKK Bijî HPG!

  4. “Kurdno! Bibin yek; eger hûn nebin yek, hûn ê herin yek bi yek” E şima vînen’ senîn a! Partîyê ma koledaranê Îran û Tirkîya reyde ney, yewbînan de şer kenî! PKK Qendil girewto xo bin de nêverdana partîyê bînî şirê Rojhelat (tayê vanî PKK û rejîmê Îranî mîyan de peymaneyê adirbestî esto). Halbukî PDK-Î PKK ra verî Rojhelat de estbî! Partîya Qazî Mihemedî ya! Nê PDKijî zî zaf nengan çinenî PKK ser, şarê ma zî orte de mendo. Heyf! Heyf hemîne rê!

  5. Ma sima qafike werde se bî sima rê sima danê jubîn ro? Xizir Xizir! Mekerê pêro medêne ret vindêrê ma pêre domane jubîn îme

CEWAB BIDE

Keremê xo ra şîroveyê xo binuse
Keremê xo ra nameyê xo binuse