Keyepel Aktuel Raverşîyayîşê pêşmergeyan dewam keno

Raverşîyayîşê pêşmergeyan dewam keno

661
0

Herbê duştê terorîstanê Dewleta Îslamî (DÎ) de hêzê Kurdîstanî raverşîyayîşê xo dewam kenê. Badê ke qezayê Giwêr û Mexmûrî kewtî binê kontrolê kurdan de, nika pêrodayîşî Jelawla (Dîyale) de dewam kenê.

Herbo giran û gonin duştê terorîstanê DÎ de hêzê kurdî raverşîyayîşê xo dewam kenê. Badê ke Giwêr û Mexmûr amey azad kerdene, qezayanê bînan de pêrodayîşî hîna dewam benê. Bitaybetî şaristanê Mexmûr de werteyê hêzê taybetî yê pêşmergeyan Zerevanî û çeteyanê DÎ de pêrodayîşê giran estbîy. Melumatan ra gore çeteyê DÎ Mexmûr terk kerd remay şîy. Sey netîce pêşmergeyê Zerevanî Mexmûr de alaya Kurdîstanî hewa naye.

Hêwler de serekê Herêma Kurdîstanî Mesûd Barzanî bi wezîrê karanê teberî yê Fransa Laurent Fabîusî de ame têlewe. Fabîusî ard ziwan ke “Ma tîya de duştê yew organîzasyonê terorî de ney, duştê yew dewleta terorîstan de danîme pêro.” Barzanî no kombîyayîş de seba pozîsyonê Fransa Fabîus rê teşekur kerd û da zanayene ke “Ma herbê xo ramenîme. Çîyo ke ma embazanê xo ra wazenîme, çekan o.” Hêzanê artêşa DYA vizêr kî hêrişê xo duştê pozîsyonanê DÎ de dewam kerd. Ame dayene zanayene ke tede xeylê çekê giranî yê DÎ amey bomba kerdene.

Seba ke werteyê kurdan û çeteyanê DÎ de dorê 1.000 kîlometreyî sînor esto, kontrolkerdişê nê sînorî bi çekanê sivikan zor o. Destê terorîstan de çekê giran ê ke înan artêşa Îraqî ra techiz kerd, estê. Erja nê çekan nêzdîyê 900 mîlyon Dollarî yo. Coka pêşmergeyan rê çekanê neweyanê giranan lazim ê. Goreyê xebera Associated Pressî ra, çekê giranî bi teknolojîya newîye hetê DYA ra amey rusnayene bi Hewlêr. Bi nê çekanê giranan yeno texmîn kerdene ke raverşîyayîşê pêşmergeyan dewam bikero. Heto bîn ra Fransa û Îtalya qerar da ci ke hewtêna hukmatê Herêma Kurdîstanî rê çekan birusnê.

Senatorê amerîkanê namdarê muhafezekarî John McCaînî kî roja bîne piştî dabî waştişê çekanê neweyan hetê kurdan ra. Xebera CNN ra gore McCaînî ard ziwan ke leyê bombardumanê çeteyanê DÎ Îraq de, gerek no kî Sûrîye de bêro kerdene ke terorîstan kok ra vîndî bibê.

PARE BIKE
DêrsimInfo
DêrsimInfo keyepelê kirmanckî yo ke serra 2010 de kewt fealîyet û xizmetê xo atraktîfkerdiş, raverberdiş, geşkerdiş û vilakerdişê kirmanckî (zazakî) de tarîf keno. Aye ra teber DêrsimInfoyî xo rê hedef kerd ke zaffikirîye û zafrengîya komelê kurdan temsîl bikero.

CEWAB BIDE

Please enter your comment!
Please enter your name here