Jiyan TV ame padayene. “Xeyr o se bîyo”, vanê tayê. Tayêna vanê: “Herinda ci de yewode bîn abeno”. Zarok TV ame padayene. “Hala hala”, vanê tayê. Qet dinya de nêameyo dîyene ke TVyê qeçekan bêro padayene. Beno ke tayêna vanê: “Tîya Tirkîya ya, wina zî beno”.

Naye ra ver rojdeme bîye “qayum”, tayê vanê “qayim”. Ezo nika zî manaya na çekuye nêzana, la ez rind zana neheqîyede gird şarê ma ser o yeno kerdene. Ez rind zana êyê ke neheqîye qebul kenê, merdimîye ra dûrî kewenê. Bedrîye Topaçe Facebookî ser o nuşto, vana: “Kes nêşêno ziwanê şima şima ra bigîro”. Na zî raşt a. La ma bi xo ziwanê xo ra dûrî kewenê. Çira? Seba ke ziwanê ma kokê xeylê ziwanan o. Nika ma rê bîyo bela.

Baş o, eke kokê heme ziwanan o, çira beno bela ke? Ganî her kes ci rê rêz bigîro! Nêke no fikrê ma yo. Êyê ke wazenê merdimîye çin bikerê, wina fikir nêkenê. Rîwalê ziwanî de çîyê nêame serê ma nêmend. Coka mayî nika bi xo domananê xo musnenê tirkî ke bela mêro serê qeçekanê înan. Tam panc serrî mamostaya mi ke nameyê ci Guler bîye, qet rîyê mi de nêhuya. Hema-hema her roje bi giştaneyê xo daye sereyê mi ro. Çira? Heta mi fam kerd, xeylê serrî vîyartî. Ez tekane qeçeko kurd yê wendegehî bîya, pey ra şenik-şenik qeçekî zêdîyayî. Mamosta Gulere yew fin zî rîyê mi de nêhuya. Gelo asabîbîyayîşê mi mamosta Guler bîye sebeb. Nêzana, qet nêzana.

Jiyan TV, halê komelê ma, qeçekîya mi, her roje gonî rijîyena. Ciwanê tewr delalî û jêhatî benê fîdayê welatê xo. Çira?

Merdim biwazo mewazo, serebûtî yenê û xo resnenê merdimî

Na meqale ya. Coka dergûdila nêyeno qalqerdiş yan zî nuştiş. Eke bi kilmî ez vajî: na dinyaya ewroyine de, no proses de kes nêşêno xo têkoşînî ver bido kîşte. Merdim biwazo mewazo, serebûtî yenê û xo resnenê merdimî. Reyayîş çin yo. Coka têkoşînkerdiş zaf ganî yo.

Nê serranê peyênan de Tirkîya de se bî ke peynîye de Erdogan û partîya ci AKP hêzdar vejîyayî. No tesaduf nîyo. Labelê çîyo tewr esas dekewtişê Tirkîya serê erdê Sûrîye bî. Dagîrkerdişê Cerablûsî gamêka stratejîke bîye û îşaretê prosesêde newe bî. Tirkîya de halo îstîsnayî zî rind nêame fam kerdene. Her kesî winî zanayêne ke do Fetullahçî bêrê çin kerdene.

Ez qala yew taybetmendîya pergala serdeste bikerî. Bi gamanê hurdîyan çîyan ceribnenê, eke cewab nêro mojnayîş, o wext gamanê esasîyan erzenê û hedefê xo ser de şinê. Tirkîya de çi çîyê ver bi Fetullahçîyan ame kerdene, dima zî ver bi kurdan ame kerdene. Bi kerdişanê Fetullahçiyan ser komel musnayêne û wexto ke serê kurdan ame kerdene, kesî vengê xo nêvet. Naye ra wet, xeylê roşnvîran verê xo çarna PKK ser û PKK rexne kerd. Taktîk û sîyaset hende xorîn yeno amade kerdene ke dostanê tevgerî vejnenê duştê ci. A nika her kes dano saqeyê xo ro la êdî bêfayde yo. Faşîzm serê xo girewt û şina. Êdî kes nêreseno ci. Êdî faşîzm zerar dana her kesî û dano xo zî.

şaredarî yenê padayene. TV yenê padayene

Plan zaf gird o. Sey xelkeyê rêzila têdima yeno praktîze kerdene. Nê rojan de şaredarî yenê padayene. TV yenê padayene. Şingal de xaftila kombîyayîş yeno viraştene. Kombîyayîş de vanê wa PKK Şingalî caverdo. Êyê ke naye vanê zî ê yê ke Şingal rot DAÎŞ û remayî şîyê. Televîzyonê MedNûçe yeno padayene. Çi sosret o ke heman wext de hemserekê HDP silayîya Ewropa kenê. Ma vîyarteyî ra zî rind zanê ke êyê ke televîzyon danê padayene, hukmatê Ewropa yê.

Planêde hîra ameyo ronayene. No plan de wazenê PKK û Tirkîya lejê yewbînî bikerê. Peynîye de do hezaran ciwan û şarê ma bêro kişteme. Coka roje roja xoverdayîşî ya. No faşîzmo nêdîyaye ver de vindertiş o. Eke winî mebo, heme şarî û merdimîye do vindî bibo. No kayo gird de Tirkîya taşeron o. Çîyo ke Tirkîya kena, buglate yo. Tirkîya xo bi xo nêşêna hende faşîstîye bikero. Êyê ke pê danê kerdene, estê. Ê zî Amerîka û Ewropa yê. Ameyoxê şaranê ma kenê tarî.

Helbet şaro kurd û şaranê bînan zî bêçare nîyê. Tevgerê azadî mojnayo her kesî ke xoverdayîş, rast têkoşînkerdiş bi xo ra serkewtene zî ano. Oyo girîng no yo ke heme şarî bêrê têhet û pêro pîya têkoşîn bikerê. Goreyê tarîxî mojneno, hêzê şaran ra zîyadêr çi hêz çin o!

Ma neçarê xo rayîr fînê, têkoşîn bikerê û ser kewê. O wext cuya ma asayî bena. O wext ma şênê bi ziwan, kultur û televîzyonanê xo ya bicuyê.

PARE BIKE
Azad Ararat
Azad Ararat serra 1969 de dewa Çêrmûge Hesto de ameyo dinya. Şeşserrîya xo de keyeyê ey bar kerd Rezana Amedî. Araratî uca de dest bi wendişî kerd. Hewtserrîya xo de şî Torbalîya Îzmirî, la tena besekerdo ke panc serrî biwano. Serra 1992 de şîyo Almanya, uca de sîyaset nas kerd û goreyê vatena xo “o dem bîyo şoreşger“. Pêro pîya new reyî cur bi cur perwerde dî. Serra 1994 de bî gerîla û vejîya koyanê Kurdîstanî ser. Şert û şurtanê zehmetinan de Azad Araratî caran fek wendiş û nuştişî ra veranêdayo. Serra 2013 de dest bi nuştişê kirmanckî kerdo. Heta ewro koyanê Kurdîstanî ser o kirmanckî museno û bi kirmanckî nuseno. Nuşte û şîîrê ey bi kirmanckî, kurmanckî û sorankî estê. Azad Ararat hîna gerîla yo û no taw Şingal de xizmetê Kurdîstanî der o.

2 ŞÎROVEYÎ

  1. Hukumat projeyê dewleta tirkan rameno û çiqas ke firsend bivîno wazeno ke kurdan çinê bikero. Labelê tîya de meseleya Fethullahçîyan û Apocîyan pêmanena. Çunku no firsend û behane înan da hukumatî. Eke Fethullahçîyan Tirkîya de darbe nêkerdêne hukumat nêşîkîyayêne hende kesan kar ra bierzo. Û apocîyan şer de israr nêkerdêne û xo nêvistêne dama dewlete, hende ciwanî (goreyê dewlete 7-10 henzar xortî ameyî kîştene) hendekan de nêmerdêne û dînamîkê xoverrodayîşî wina qut nêbîyêne, hende mamostayî kar ra nêerzîyayêne, hende şaredar tewqîf nêbîyêne hende şaredarîyan rê qeyim tayîn nêbîyêne. Yanî bêferasetî û şaşîya rêxistinan bi sebeb ke dewlete nê muşruîyetî peyda bikero. Coka ra dinya de kes vengê xo nêkeno.

    Dewlete rexne kerdiş asan o û xora her kurdo hişyar zano ke mesela çi ya. La xetayanê rêxistinan vatiş mîyanê kurdan de hema zî kemî yo. Cora rexneyê tayê rewşenbîran ca de yo. Verê 7 hezîrane yew mutabeqatê kurdan hema hema virazîyabî. Hukumatê AKP kewtbî. La bi “şerê PKK-AKP” (çunke PKK va “ma bi dewlete ney bi çeteyanê AKP şer kenê”) AKP çend mengî dima reyan weçînayîş kerd û reyna bî îqtîdar. O dem de PKK tena cayê xo de bivindertêne, xo nêvistêne dama dewlete, sebir bikerdêne bes bi. Labelê firsend rema û kurdan zerarêko pîl dî. Nika zî ne kurdan ra ne zî teberê kurdan ra veng nêvejîyeno.

  2. Amerîka û Ewropa yê ke çekan danî kurdan, danî YPG zî! (pê mabêndarîya PDK zî!) Bê bombardûmanê jetanê Amerîka ne YPG gamêk aver eştêne ne zî pêşmergeyan.
    Gune zewbîna ca de gêrayîş asan o la her sosret, zilm û zerar tena karê dişmenan nîyo. Biewnî tarîx ra! Dişmenê kurdan o tewr pîl daîma kurd bi xo bîyo, çunke ewro zî tay biaqilê ma estê qandê înan neteweperwerîye û welatperwerîye ra zîyade partî, îdeolojî û serekî muhîm ê! Ha vaj ha vaj!!

CEWAB BIDE

Please enter your comment!
Please enter your name here