Çeteyê terorîstî Dewleta Îslamî (DÎ) -raver ra DÎÎŞ bî, nika nameyê xo vurna kerd DÎ- Kurdîstanê Başûrî de hêrişê qezaya Şengalî û Rabîa kerd. Pêşmergeyî û YPG duştê terorîstan de danê pêro. Xeylê êzîdîyî mecbur bîy ke biremê.

3. tebaxe de hêzê DÎ kewt şaristanê Rabîa, Zumar û Şengalî yê Kurdîstanê Başûrî. Sey cewab, pêşmergeyan Kurdîstanê Başûrî de duştê çeteyanê DÎ de operasyonêde girs viraşt. Pêşmergeyî çar hetan ra hêrişê DÎ kenê ke nîya Şengal azad bikerê.

Wezîrê Pêşmergeyan Cebar Yawerî da zanayene ke operasyonî hem dormeyê Şengalî hem kî Zumar de yenê viraştene. “Heta ke pêşmerge reşt serfirazîye, operasyon dewam benê.” No operasyon de kontrolê Zumar û Rabîa ancîya kewt destê kurdan. Badê ke nê mintiqayî amey azad kerdene, pêşmergeyî raya xo çarnaye hetê Şengalî. Şengal de pêrodayîşê giranî dewam kenê.

Serdarê pêşmergeyan Saîd Kesteyî tesdiq kerd ke operasyonanê hewa û erdî dest kerd ci. “Heta ke ma nê cayî terorîstan ra pak nêkerd, ma cayê nêşonîme.” Boyna Kesteyî kerd eşkera ke hêzê antî-terorî yê Herêma Kurdîstanî, Zerevanî, bi pêşmergeyan ra pîya pêro danê ke Şengal azad bikerê.

Xeberanê tezeyan ra gore terorîstê DÎ zereyê şaristanî de hetê pêşmergeyan ra çarnîyay. Goreyê hêzanê Zeravanî ra di rojan de 90 endamê DÎ amey kiştene.

Pêşmergeyan rê çekê neweyî

Xebera Wezaretê Seveknayîşî yê Herêma Kurdîstanî ra gore, çekê neweyê giranî amey ardene. Çekê ke roja bazarî meydanê teyara yê Hewlêrî de amey, seba herbê duştê DÎ de yenê xebitnayene. Cebar Yawerî melumatê nîyanênî day: “Hêzê pêşmergeyan nika wayîrê pêro çekanê modernan, teyarayî netede, yê. Ma de nika teze topê giranî, tankî û çekê otomatîkî yê giranî estê.”

No derheq de spîkerê Wezaretê Seveknayîşî Recep Erbîlî medya rê da zanayene ke “Çekê ke abîşew reşt ma, desinde amey neql kerdene bi cebheyê pêşmergeyan. No ra dime kî emrê teqwîya hêrişî ame dayene. Na saete de leşkerê ma hîna ceng der ê.”

YPG û Pêşmergeyî pîya danê pêro

Heto bîn ra tayê gerîlayê YPG seba piştgirîye vîyart başûr û dormeyê qezayê Rabîa û Şengalî de duştê DÎ de pîya danê pêro.

Serdarê YPG Polat Canî Basnews rê da zanayene ke “Mintiqayê hetê Rabîa heta Pirdê Sihela binê kontrolê ma der ê. Pêşmergeyî û gerîlayê YPG piştî ya piştî duştê çeteyanê terorî de danê pêro. Pêşmergeyê ke vizêr amey dirbetin kerdene, Rojawan de tedawî dîye. (…) Ma do îşxalê Şengalî bivindernîme. Heta gonîya ma ya peyêne ma pêro danîme ke yew Anfalo dîyin nêvirazîyo!”

Goreyê xebera ANF ra kî hêzê YPG ver bi koyê Şengalî seferber bîy ke bi hêzanê Asayîşî ra pîya remayoxan rê ardim bikerê. Hêzê YPG Kurdîstanê Rojawanî ra ewro peroj kewt raye û nika reşt koyê Şengalî. Mabênê DÎ û YPG de kî pêrodayîşî qewimîyay. Hêzê YPG û Asayîş mabênê Şengal, koyê Şengalî û dewa Sînune ke 15 km dûrî yo, yew korîdor virazenê ke nîya şar besekeno biremo.

Dorê 200.000 remenê

Melumatan ra gore dorê 30 sîvîlê êzîdîyî hetê rêxistina terorîst a DÎ ra amey qetl kerdene. Tayê çimeyan ra gore na hûmare 88 a. Dorê 200.000 kurdî kî mintiqa ra remenê bi Duhok ya kî Koyê Şengalî. Koyê Şengalî de ne awe ne kî nan esto.

Goreyê Xadir Domlî, yew aktîvîsto êzîdî û rojnameger ke Duhok de ciwîno, duştê êzîdîyan de qetlîamê giranî estê. Bi desan merdimî amey kiştene, bi seyan cinîkî kî amey remnayene. Domlî va ke milet bê nan û sole remeno Koyê Şengalî ke uca sitar bivîno. Gerek ardim bêro rusnayene înan.

“Ya musulman bibê ya kî bimirê.”

Çimê terorîstanê DÎ de pêro êzîdîyî kafir ê, coka DÎ înan ra va ke “Ya musulman bibê ya kî bimirê.” Basnews ra gore xeylê êzîdîyî texdîdê merg û îşkenceyî ra mecbur mendî ke bibê musluman. Aye ra kî dot tora telefonanê destan ameye birnayene, nîya kes besenêkeno Şengalî rê pê telefon bireso.

Xebera Rûdawî ra gore şaristanijê Şengalî roja bazarî yew kombîyayîş viraşt, tede qerar dîya ke şar şaristanê xo bisevekno. “Zafê xortanê ma hezir ê ke şêrê cebhe û duştê DÎ de pêro bidê”, Saîd Mistoyî, yew êzîdîyê namdarê şengalijî, da zanayene. Nika leweyê pêşmergeyan de 2.000 xortê êzîdîyan seba seveknayîşê welatê xo duştê DÎ de danê pêro.

Şengal kotî yo?

Badê ke çeteyê DÎ Mûsil ardbî xo dest, terorîstan hêrişê Kobanê û Hesekê (Rojawan de) kerd. Dima Başûr de hêrişê Şengal, Rabîa û Zumarî ame kerdene. Vizêr saeta 02:00 de dewanê Şengalî sey Girzerik, Sibaşêxidir, Tilbenat, Tilkasab û Koço hetê çeteyan ra bi topan amey piro dayene. Xeylê dewijî remay ver bi Koyê Şengalî.

Şengal rojhelatê Mûsilî de, nêzdîyê sînorê Îraq û Sûrîye der o. Goreyê maddeya 140. yê qanûnê bingeyî yê Îraqî ra, Şengal yew mintiqaya bêstatu ya, çike hîna referandum nêame kerdene eke girêdayeyê Herêma Kurdîstanî ya kî yê Îraqî bibo. Bi zafêrî uca kurdê êzîdîyî ciwînê, aye ra kî dot erebê şîî û sunî û tayê suryanî estê. Nufusê şaristanê Şengalî bi xo dorê 30.000 yo, labelê qezayê Şengal û Rabîa (Neynewa) de bi se hezaran kesî ciwînê.

Şaristan bi xo keyberê sînorî yê Til Koçerî ra 100km dûrî yo. Hêzanê DÎ nê keyberî ra hêrişê xo yê Rabîa ke başûrê rojawanî yê Şengalî der a, viraşt. Herêma Kurdîstanî Şengal ra tenê dûrî ya: heta Duhok 250km raye esta.

3 ŞÎROVEYÎ

  1. YPG tena nejdiye cebere Rabia ya dero. Sengal de hezane YPG cino. Medyaye PKK de taye cepgire Tirki u MIT xebere juren vezene. Vaneke Pesmerge Sengal de cino, ramo, pero nidane. Pero juro. Xebere neweyane gore DI duste Pesmergeye Kurdistan ni cayi keno vind.

    Hete binra medyaye PKK de Pesmergeyi ra vane “Pesmergeye KDP”. Uskade ju dewlete esta u ni Pesmergeyi giredayiye ju partiye niye, iy Pesmergeye Kurdistan e. Caye niya dismeniya nimitey sima kene, endi waxt niyameke na siyaseta xeletiye u ajane ke medyaye sima kene qilerin biwisiye??? Ebe na bomen 2 serre de Kurdistan de nameye sima nemaneno.

    Biji Kurd u Kurdistan!

CEWAB BIDE

Keremê xo ra şîroveyê xo binuse
Keremê xo ra nameyê xo binuse