Keyepel Aktuel Parîs de hîrê sîyasetkarê kurdî kişîyay

Parîs de hîrê sîyasetkarê kurdî kişîyay

986
2

Hîrê sîyasetkarê kurdî Sakîne Cansiz, Fîdan Dogan û Leyla Şaylemez vizêr şewe paytextê Fransa Parîs de amey kiştene. Goreyê melumatan cinîyî sere û pîze ra panîyay, henî aseno ke hîrê kurdî înfaz bîy.

Ame dayene zayene ke yew kes yan tayê kesî şîy Buroyê Enformasyonî yê Kurdîstanî kuça Lafayette nêzdîyê Gare du Nordî de û sîyasetkare Sakîne Cansiz, temsîlkara KNK ê Parîs Fîdan Dogan û Leyla Şaylemez qetl kerdî. Vanê qey suîkast de çekê bêvengî amey xebitnayene, labelê hîna beyanato resmî nêame dayene.

Goreyê polîsê fransizî ra hîrê cinîkî çarşeme peşewe ofîs de tena bîy, keyber elektronîk kilîtkerde bî. Rojnamegere û hevala Fîdan Dogan Selma Akkaya, seba ke hevalanê xo nêreştîbî, bi tayê embazan ra pîya şîy ofîs. Keyberê ofîsî de rêça gonî estbîye, coka keyber şikit û verê saeta 01:00 de kewtî zere ke meyîtê hîrê cinîyan bivînê.

Buroyê Antîterorî yê Parîsî nika dest bi tehqîqetî kerd. Wezîrê Karanê Zereyî yê Fransa Manuel Vallsî da zanayene ke qetlkerdişê hîrê sîyasetkaranê kurdan “suîkast o ke qebul nêbeno. (…) No serebûtêde alelade nîyo. (…) Mumkîn nîyo ke ma hêrişêde nîyanên qebul bikerîme.”

Kiştişê hîrê cinîkan Kurdîstan û Fransa de protesto bî. Bi nûmayîş û sloganan bi hezaran kurdî verê banê Buroyê Enformasyonî yê Kurdîstanî de amey têlewe. Sloganî sey “Qetile Tirkîya” amey eştene. Fransa de nêzdîyê 200.000 kurdî ciwînê.

Qurbananê suîkastî ra Sakîne Cansiz serra 1957 de Dêrsim de ame dinya. Perwerdeyê xo Xarpêt de dî û serra 1976 ra tepîya xo da sîyasetê kurdan. Des serran ra zêde hepisxaneyê Amedî de îşkence dî, serra 1991 de kî vejîya teber. Cansiz weşîya xo ya sîyasî Parîs de ramitêne, sazkerdişê PKK de endamanê  verênan ê cinîyan ra yewe bîye. Sazkerdoxanê weşan ra cinîya yeweke bîye. Ewropa de seba PKK berpirsîyara cinîyan bîye.

Fîdan Dogan 1982 Mereş Elbîstan de ame dinya. Keyeyê xo ke bar kerd şî Fransa, a kî uca bîye pîl. Serra 2002 ra dime kewte karê dîplomasî. A Parîs de temsîlkara KNK yê merkezê Brukselî bîye, karê dîplomasîya KNK û Yewîya Ewropa kerdêne.

Leyla Şaylemez kênaya keyeyêde êzîdî yê dîyarbekirijî bîye. Keyeyê xo semedanê zulmê dînî ra welat terk kerd şî Almanya. Şaylemez wendişê xo yê mîmarîye caverda û kewte karê sîyasetê kurdan. A  sey temsîlkara cinîyan a rêxistinbîyayîşê PKK têkilîyanê dîplomasî de gureyayêne.

PARE BIKE
DêrsimInfo
DêrsimInfo keyepelê kirmanckî yo ke serra 2010 de kewt fealîyet û xizmetê xo atraktîfkerdiş, raverberdiş, geşkerdiş û vilakerdişê kirmanckî (zazakî) de tarîf keno. Aye ra teber DêrsimInfoyî xo rê hedef kerd ke zaffikirîye û zafrengîya komelê kurdan temsîl bikero.

2 ŞÎROVEYÎ

  1. Kamoke çeberane dewleta Tirki de astiye vazeno, biveno ke inura tene qursune, bombay u kistene yena… Na sar ra gunao… Endi reca tirkuna bivisiye… hatake no nebi gon u merdena dewam beno

CEWAB BIDE

Please enter your comment!
Please enter your name here