Kurdîstanê Vakurî û Tirkîya vizêr, roja 24.06.2018î de, weçînayîş qewimîya. Na fay hem parlamento hem kî serekkomarî/e ame/ye weçînayene

Weçînayîşê Parlamentoyî

Weçînayîşê Parlamentoyî de hîrê blokê bingeyênî serkewte vejîyayî. Partîya îqtîdarê Tirkîya AKP û partîya nîjadpereste MHP koalîsyonê “Îtîfaqê Cumhurî” naye ro. Partîya kemalîste CHP bi partîya rastgira tirkan ÎYÎ û Saadet ra koalîsyonê “Îtîfaqê Miletî” naye ro. Partîya HDP sey xo kewte weçînayîş.

“Îtîfaqê Cumhurî” % 53,65 yê rayan girewt û nîya zafêrîya parlamentoyî girewt xo dest. “Îtîfaqê Miletî” bi % 33,96 vejîya, HDP kî cayo hîrêyin de % 11,69 girewt û nîya bend vêrd ra. Pêro pîya %86 yê weçînitoxan beşdar bîyî.

 

Tayê mintiqayî netede, zafêrîya Kurdîstanê Vakurî de HDP tewr zaf rayî girewtî. Qezayê ke tede AKP/MHP serkewte vejîyayê, Bidlîs, Çewlîg, Dîlok, Erdêxan, Erzingan, Erzirom, Gurgum, Meletî, Qers, Reşqelas, Riha, Semsûr, Sêwas û Xarpêt ê.

Netîce de AKP (295 qoltuxî) û MHP (48 qoltuxî) pîya zafêrîya parlamentoyî gênê. HDP 67 qoltuxî girewtî (2015: 59).

Weçînayîşê Serekkomarîye

Weçînayîşê serekkomarî de Recep Tayyîp Erdogan bi %56 yewin vejîya. Cayo dîyin de bi % 39 CHP ra Muharrem Înce ame. Selahadîn Demîrtaşo ke hepisxane ra kampanyaya xo ramite, cayo hîrêyin de % 10 girewt.

Bi nê netîceyî Erdogan serekkomarê Komara Tirkîya maneno. La seba ke par referandumê qanûnê bingeyî estbî, emser ra dime desthelatê serekkomarî bîyî zêde. Qanûnê neweyî ra gore Tirkîya de êndî serekwezîr çin o, serekkomar hem beno temsîlkarê hukmatî hem kî serekê hukmatî. Serekkomar nika ra dime besekeno tayê qeraran bê destûrê parlamentoyî bido ya kî parlamentoyî wedaro. Wezîfedarkerdişê wezîr, general û dadgeran kî destê serekkomarî der o.

CEWAB BIDE

Keremê xo ra şîroveyê xo binuse
Keremê xo ra nameyê xo binuse