Ekîbê Dîyarbekirî ke nameyê xo “Diyarbakır Büyükşehir Belediyespor” bî, qerar girewt ke nameyê xo bivurno bikero Amedspor. Waştişname ame rusnayene Federasyonê Futbolî yê Tirkîya (TFF). TFF kî seba nameyê Amedsporî cezaya 10.000 Lîra da ekîb.

Keyepelo resmî yê TFF de yeno nuştene ke cezaya 10 hezar TL ameye dayene, çike Amedspor bê ke tescîl bibo, name û logoyê xo xebitna.

Amedspor Spor Toto Lîgo 2. de kay keno. Serekê kulube Îshan Avci vilaweka xo da zanayene ke heyetê pêroyî qerar dabî ke nameyê ekîbî bibo Amedspor, rengê ekîbî bibê kesk, sûr û çeqer, logo kî bibo amblemê Dîyarbekirî: hêlîyo bi di seran. No qerar kî hetê Mudirîya Komelanê Dîyarbekirî ra tesdîq bîyo.

Avcî derheqê qerarê TFF de va, “Ma no sey xeletîye vînenîme. No derheq de ma xo seveknenîme. Waştişê ma yo ke na xeletîye bêro rast kerdene û eynî dem de kî kuluba ma ra ozr bêro waştene. No hetê Federasyonî de skandalêde huqûqî yo newe yo.”