Serekê Herêma Federal a Kurdîstanî Mesûd Barzanî beşdarê Konferansê Asayîşî yê Munîhî bî. Uca Barzanî bi xeylê sîyasetmedaranê dinya ame têlewe.

Konferanso 51. de, Mesûd Barzanî derheqê halê Herêma Kurdîstanî de qisey kerd û no semed ra bi wezîra karanê teberî ya DYA Madeleîne Albrîght, wezîrê karanê teberî yê Swîsî Sebastîan Kurz û yê Xirvatîstanî Vesna Pusîç de ame têlewe. Mewzûyo bingeyin cengê pêşmerge û çeteyanê “Dewleta Îslamî” (DÎ) bî. Derheqê rewşa Îraqî de kî fikrî vajîyayî.

Dima, Barzanî tewrê konferensa tabyetîne bî. Uca, selahîyetdar û temsîlkaranê artêşa DYA de pîya qalê serkewtişê pêşmergeyan bî. Barzanî waştişanê xo ardî ziwanî. Bi vatena xo, Barzanî da zanayene ke pêro kombîyayîşan ra netîceyo pozîtîf vejîya. Nê netîceyî kî seba pêro kurdan mîzgîn ê.

Almanya pêşmergeyan rê hîna zaf çekan rusnena

Roja bazarî Barzanî bi senatorê DYA John McCain û heyetê xo de peyê keybaran de qisey kerd. Tede kî wezîrê pêşmergeyan Mustafa Seyîd Qadir estbî. Kombîyayîş ra dime Barzanî da zanayene ke DYA soz da ke bitaybetî multecîyanê Kurdîstanî rê ardim bikerê. “O ra teber kî DYA rolê pêşmergeyan duştê çeteyan de goyna”, Barzanî va.

Kombîyayîşo tewr faydeyin bi şansolyeya almane Angela Merkel bî. “Merkel ra şarê kurdî rê xeylê mesajê pozîtîfî ameyî dayene. Almanya soz da ke hîna zaf çekan birusno pêşmergeyan.”

CEWAB BIDE

Keremê xo ra şîroveyê xo binuse
Keremê xo ra nameyê xo binuse