Keyepel Nuştoxî ra Alî Beytaş Kurdî û Weçînitişê 2011 – Alî Beytaş

Kurdî û Weçînitişê 2011 – Alî Beytaş

313
1

 

Her weçînitiş hertim muhîm o. Feqet weçînitişê 2011 jû daha zaf muhîm o. Seba kurdan na muhîmîye bena di tebaq (qat).

Serkewtena ameyoxê xelefanê Tirkîya, girêdayeyê serkewtena ameyoxê kurdan a. Coka her kurd û her muhalîfê Tirkîya na raştîye ser o gere rind bifikirîyo. Weçînitişê 2011 de her xelef û her kurd wezîfêde tarîxî ano ca.  Serkewtena ameyoxê  kurdan goreyê na rewşe analîze bena. Naye kam analîze keno? Her kes. Çinayî rê analîze keno? Goreyê menfeatê xo yê polîtîkî. Çimke her kes o gore hesab û kitabê xo virazeno.Y a kurd giran yeno sentiş ya kî sivik yeno sentiş. Kam senceno? Her kes. Ma keso kurd se kero? Gere xo giran bisenco. Kotî? Mucadela xo û weçînitişê 2011 de.

Kurd û xelefanê Tirkîya, çiqas ke bi vatîşanê reelan vejîyê huzurê weçînitoxan, honde kî benê serkewteyî. Serkewtena kurdan serkewtena ameyoxê înan a. Serkewtena kurdan û xelefanê Tirkîya serkewtena domokrasî ya. Na rewşe kî Tirkîya verba demokrasî bena.

Eke însan rewşa kurdan bi rewşa dinyaya newîye bîyaro ziwan, şîkîno vajo: Dinya vurîya. Dinyaya newîye vurîyayîşê neweyî kî xo de ardê û hona kî ana. Serkewtena têde xelefanê dinya kî goreyê na rewşe vurîna. Eke xelefî na rewşe rind analîze bikerê û mucadela xo goreyê na rewşe bidê dewamkerdiş, o gore kî benê serkewtin. Mîsal, şarê Rojhelatê Mîyanênî rewşa welatanê xo ya verêne êdî qebul nêkeno û vurîyayîş wazeno.

Bi serewedaritiş sermîyananê welatanê xo vurnenê. Bi gonî bo kî, nê serewedaritişanê xo ra derbaz nêbenê. Herçiqas ke peyê şarê Rojhelatê Mîyanênî de zobîna kesî û dewletê emperyalîstî bibê kî, na rewşe reyna kî rewşade muhîm a.

Dinyaya newîye hem vurîna hem kî demê vurîyayîşê xo de problemê ke vurîyayîşê aye rê sey engel ê, wazena ke înan kî hel bikero. Seba kamî wazena? Seba ameyoxê dewletanê emperyalîstan, yanî seba xo. Çinayî rê wazena? Çimke qezencê dewletanê emperyalan henî wazeno, coka. Çimke rewşa dinyaya newîye henî wazena, coka.

Nê problemî kamcîn problem ê? Problemê ke dinyaya kane hel nêkerdê û pey de eştê, bêçareserîya înan taliq kerda, ê problem ê. Şarê dinyaya newîye nika dewletanê emperyalîstan ra çareserîya nê probleman wazeno. Qebulkerdişê estbîyayîşê xo wazeno.

Mesela şarê Tirkîya çareserîya mesela kurdan wazeno. Çareserîya mesela elewîyan wazeno. Çareserîya mesela cinîya, ekolojî, demokrasî, huqûqê însanan ê bingeyênî ûêb. wazeno. Rewşe taliqkerdişê mesela kurdan teyna 85 serrî yo ke dewam kena. Mesela elewîyan bi se serran no dewam kena. Nê di problemî problemê kan û zor ê.

Eke ma bi fikrê dinyaya newîye meselan de nîyadîme, vînenîme ke çareserîya meselanê taliqkerdan yew bi yew yena ca. Dinyaya ewroyî çareserîya problemanê taliqkerdişan mewazo kî, wayîranê nê probleman de êdî baş nêkena. Xora dinyaya newîye kî bêçareserîye nêwazena. Çareserîya nê probleman de menfaatê xo kî vînena. Goreyê menfaatê xo formîlanê çareseran virazena.

Labelê, eke qesa ameye çareserîya mesela kurdan ser, dewletê emperyalîst û kolonyalîstî pey de remenê û wazenê ke na mesela tayê de bîn bêçareserîye verdê û bidê taliq kerdene. Feqet êdî nêşikînê. Çimke dinya dînyaya kane nîya, kurd êdî kurdo verên nîyo. Kurd êdî bîyo polîtîka û huqûqê xo zano.

Coka têde kurdî gere weçînitişê 2011 de vengê xo berz kerê û polîtîka qisey kerê. Vajê ke weçînitişê 2011 seba ma zaf muhîm o. Çimke:

  1. Seba aştîye, azadîye û muxtarîya kurdan
  2. Seba çareserîya problemanê kurdan
  3. Seba qanûnêde bingeyî yo newe
  4. Seba ameyoxê huqûqê kurdan
  5. Seba komelê meşrûyetê kurdan
  6. Seba ameyoxê sîyasetê Tirkîyaya demokratîke
  7. Seba parlamentoyo newe. Çimke parlamentoyo newe yeno manaya meclîsê awankerdeyî
  8. Seba yewîya neteweyê kurdan
  9. Seba komara domokratîke û muxtarîya kurdan zaf muhîm o.

Eke şaro kurd weçînitişê 2011 de serkewte mebo, se beno? Bi gumano pîl, hukmatê Tirkîya (kamcîn beno wa bibo):

  1. Wazeno ke hereketê azadîya kurdan tasfîye kero.
  2. Eke nêşikîya tasfîye kero, wazeno ke zor de verdo û teyna kero.
  3. Eke nêşikîya naye kî bikero, wazeno  ke entegrê sîstemî  kero, stratejîyê mucadela înan bivurno û bido destê kesanê bînan
  4. (Wazeno ke PKK û BDP çareserîye mîyan ra vejo)

Bi qesa kilme, kifş beno ke weçînitişê 2011 seba kurdan zaf muhîm o.

Alî Beytaş

 

PARE BIKE
Alî Beytaş
Alî Beytaş serra 1956 de dewa Gimgimî Kûzike de ameyo dinya. Ey 1978 wendegehê maliman qedêna û dima new serrî sey malim Gimgim de xebitîya. Peyê cû Mersîn de 19 serrî gureya û uca xebatê sendikayan ra mektebanê cîya-cîyayan de malimîye kerde. Serra 2006 de teqawut bîyo. Alî Beytaşî kovaranê Vate, Şewçila, Tîroj û rojnameyê NewePelî de nuşt. Aye ra kî teber, yew kitabê xo bi nameyê "Şaîsmaîl" neşr bî.

1 ŞÎROVE

  1. Mira gore careye mesela Kurdi, parlamentoya ke hata bika terteleye, qetliame Kurdi imza kerdo, niyo. Kurdi ebe 30 ni 300 Wekilik na parlamentode besenikene ke ju qanune seba haqiya Kurdi biveze. Na komare u parlamento 90 serro re ke sare xo mezge xo deznena ke, inan sare ma cutir biqedene, asimile kere.

    No 10 serre roke peyen de ma dime ke, ebe siyaseta komera demokratik usn. qe dae nibeno hal kerdena. Na siyasete tena xapnena sare Kurdi yo. 10 serre tepiya sereke Kurdik ney vano. KT (Komera Tirkiya) 10 serre ma niya xapna. Ik zonene ke chi qasi ke waxt viyerd, no kara KT yo. Mirena kokimune made ziwane ma, kulture mak mirene. Na semeda KT vano nika weciniso dae niken, tepiya vane zimistano serdo nika nibeno, usar de siliye vorena qisey kerdise serre mesela kurdi nibeno, amlon zof germo, nibeno. Yani niya amo niya sono. Hete binrak tarix te qe misale xo chino ke Tirki ebe astiye dae qebul kerdo.

    Gerekeke welatperweran Kurdi ye ke na 10 serre peyende siyaseta KT qan biye, hesaw bide. 10 serre heve niya.

    Parlamentoye, wechinise, mektebe her ciye na sistem gerekeke biyero boykot. Sivile beitaetiya girs ra u xoseriyare qeder sare Kurdi de her serre niya yeno kay kerdene.

CEWAB BIDE

Please enter your comment!
Please enter your name here