Keyepel Ekonomî Juna (yewna) prognozê krîzî

Juna (yewna) prognozê krîzî

120
0

“Pisporê krîzî” ey ra vanê, nameyê xo Roland Leuschel o û o seba prognozanê xo borsa ser o namdar bî. Leuschelî heta nika krîzê 1987 û 2008 îsabetin texmîn kerdîbî. Nika ey kerd eşkera ke juna (yewna) krîzê borsa beno nêzdî.

Leuschel xebera rojnameyê almane Welt ra gore kerdo eşkera ke borsa nêzdî de dorê 15-20% ginena war ro. No semed ra Leuschel kapîtalê xo borsa ra anto (onto). Ey ra gore vejîyayîşê borsa nê 2 serran de zêde lerze bî. Naye ra kî dot deyngirewtişê xeylê welatan beno juna (yewna) sebebê warroginayîşê pîyaseyanê aksîyonan. Halê ekonomî ra teber serewedaritişê şaran ke xo no taw welatanê ereban de bellî beno, erja petrolî keno berz. Nê hîrê faktorî Leuschel ra gore reaksîyonê xo krîzê borsa de nîşan danê.

Fîyatberzîya petrolî ekonomî de hûmara enflasyonî kena zêdîye û bi zêdîyayîşê enflasyonî kî erja maaşê karkeran bena kêmî, yanî hêzê herînayîş beno kêmî. Dewamê naye kî kêmîbîyayîşê karê fîrmayan o. Fîrmayî ke tay kar kerd, aksîyonê înan borsa de ginenê war ro.

 

PARE BIKE
DêrsimInfo
DêrsimInfo keyepelê kirmanckî yo ke serra 2010 de kewt fealîyet û xizmetê xo atraktîfkerdiş, raverberdiş, geşkerdiş û vilakerdişê kirmanckî (zazakî) de tarîf keno. Aye ra teber DêrsimInfoyî xo rê hedef kerd ke zaffikirîye û zafrengîya komelê kurdan temsîl bikero.