Nê her dimîna kesî kî dêrsimij ê. Mehmet Maçoglu, endamê Partîya Komunîstan a Tirkîya (TKP) wo û Pulur de serra 1968 de amo rîyê dinya. Kemal Kiliçdaroglu kî serekê CHP o û  Qisle (Nazmîye) de serra 1948 de amo rîyê dinya. Nika ma berîme mesela xo ya weçînitişî  ser. Raşta kî ez nêzana ke nê tayê kirmancê ma û tayê tirkî Mehmet Maçogluyî qey honde goynenê?

Gelo nuk û nîskan rameno, coka? Ez sere de na vatena xo vacerî û henî tayê Maçogluyî rexneyê bikerî, tayê kî heqa mordemekî ci derî. Helbet Maçogluyî seba miletê xo tayê xizmet kerd, tayê projeyê xo rindî bîyî. Nê projeyan ra juyê kî mavacerîme burs dêne wendekaranê feqîran, hîrê taxanê Pulurî de wesayîtê şaredarîye miletî rê kerdbî bêpere û ez bawer kena ju kî awe kerdbîye erzane.

Gelo nuk û nîskan rameno, coka?

Wa xwezîla ke mesela ma, mesela nuk û nîskî bîyêne, nika rewna mesela şarê ma hal bîbî. Ma bizanitêne ke bi di-hîrê kîloyanê nuk û nîskan kar rayê ra şono, ma kî dest bi xebata cotkarîye kerdêne û hêga û axpînê ke estê çîn ê, ma ê xo rê biramitêne.

Naye her kes rind bizano ke ma rê nuk û nîskî çîyê nêanê. Gere mordem virêndîye verba zulmê zulmkaran de mucadele bikero û  welatê xo, miletê xo, kamîya xo azad kero û aye ra dima kî zonê xo rê, kulturê xo rê, bawerîya xo rê kî xizmet bikero û ci rê wayîr vejîyo.

Raxelesîyena qomê ma bi nuk û nîskan nêbena. Bi serran o ke Dêrsim de HDP verba xayîn û bêbextan de mucadele kena ke wa xayîn û bêbextî welatê ma talan mekerê, miletê ma rê zulm û zordarîye mekerêne û seba naye kî bedelode zaf giran da. Hukmatê AKP kî bi zulm û zordarîye, bi qayumî şaredarîya Dêrsimî HDP ra gurete. No semed ra kî HDP waşt ke nê weçînitişî de dersa zulmkaran ci dero.

Verba na nêheqîyênî de gelo Maçogluyî se kerd? Firsend no firsend o û ame Dêrsim de bî namzed. E ma na bêbextîye nîya, çik a, e ma na nêheqîye nîya, çik a, e ma na dişmentîye nîya, çik a? Nafa kî vazeno ra Maçoglu vano “hevalî mi rexne kenê.” E ma hevalî to rexne mekerê, se bikerê? De vace!

Di-hîre çekuyî kî Kiliçdarogluyî rê!

Nê weçînitişê 31. adare de şaredarîyê şaristananê girsan ê zê Îstanbul, Anqara, Antalya, Adana, Mersîn û Îzmîrî CHP guretî. Nayê ser o nika Kiliçdaroglu kî xo ser o şono û vano no hunerê min o. Kiliçdaroglu ronişo û ravazo, HDP rê û birêz Demîrtaşî rê dua bikero ke bi destekê kurdan şaristananê girsan de weçînitiş guret.

Way liminê way, Kiliçdarogluyo ke rojê HDP nêgurete fekê xo, rojê nêwaşt ke bi wekîlanê HDP ju fotograf bido medya, honda wo ke dest ra ame, HDP ra dûrî rema. Bi naye kî nêmend, meclîs de partîya CHP û Kiliçdarogluyî bî sebebê tewqîfkerdena birêz Demîrtaşî û Demîrtaş rusna hepisxaneyê Edîrne yê tîpê F. Ma kamcîye vacerîme, kamcîye mevacerîme. Ewro ancîya kî Kiliçdaroglu ne birêz Demîrtaşî û ne kî HDP nas keno. De bê memire, hela se nêmirena?

CHP kurdan nas kena?

Nê nêresenê tozê binê linganê birêz Demîrtaşî. Qayît be, mordemek mîyanê çar dêsanê hepisxaneyî der o ancîya kî verba zulmê faşîstan de vatena xo ano ra zon. Seke yeno zanitene, birêz Demîrtaşî hepisxaneyê Edîrne ra seba weçînitişê 31. adare mesaj rusna, va ke “eke misqalê xatirê mi esto, ricaya mi na wa ke luzum keno kemere serê zerrîya xo ser nê, la miheqeq şorê sindoqan û faşîzm rê ney vacê. Beno ke netîceyê weçînitişî demokrasî û aştîye rê beno wesîle”.

Na vatena Birêz Demîrtaşî ser o kurdî şaristananê girsan de şîyî sindoqanê weçînitişî û rayê xo dayî CHP. Namzedanê CHP kî bi destekê kurdan şaredarîyê şaristananê girsan guretî. Gelo ewro Kiliçdaroglu û partîya Kiliçdarogluyî CHP kurdan nas kena? Ancîya persa kurdan înkar kena, ancîya nas nêkena, ancîya kurdan ra dûrî remena û naye kî ma rind zanîme ke kurdî ancîya tek û teyna manenê.

Yanî, birayê ma yê roja tenge çîn o.

2 ŞÎROVEYÎ

  1. Maçoglu komunîst fîlan nîyo, karîyerîsto û sê Erdogan populîsto. Seba wekîlen beno ke bikuyo AKP. No seba Dêrsim ju rastîya sîya ya.

  2. Sere de vana seba şîreveyê xo weş û war be embaz o delal.

    Wulle komunîst o, komunîst nîyo nêzana, la karîyerîst û populîst o. Seke to nêvana mêşte-bîro AKP de beno wekîl kî. Çunke nê weçînitişê 31. adare de AKP qezayanê Dêrsim de ez bawer kena di şaredarî guretî. Bi no qeyde wekîlan kî vecena…

Comments are closed.