Jenosîdê Dêrsimî yê serranê 1937 û 1938 bêro verê Mehkemeya Ceza ya Mîyannetweyî yê Den Haagî. No sebeb ra gureyayîş dest kerdo ci ke terteleyê Dêrsimî bi belge û melumatê arşîv û şahidan ra bibo mesela dadgeha mîyanneteweyî.
Komela Neweraviraştişê Dêrsimî ya Almanya ra Haydar Işikî da zanayene ke xebata prosesê mehmeke dest kerde ci. Xeylê rêxistinê kurdan kî destek danê no hedef.
Qerarê şîyayîşê mehkeme 24. teşrîne 2010 ede konferansê Dêrsim 1938 de ke parlamentoyê Berlînî de ame viraştene, ame girewtene. Avûkatê komela Neweraviraştişê Dêrsimî 4. nîsane 2011 de kî şîy Îstanbul de komelanê cîya-cîyayan de amey têlewe. Ê bi TOHAV, Merkezê Kulturî yê Mezopotamya, ÎHD û roşnvîranê dêrsimijan ra amey pêser. Işikî ra gore 10. nîsane de kî Dîyarbekir de avûkatan ra pîya stratejîya huqûqî ame plan kerdene. Aye ra teber kî îfadeyê şahidanê jenosîdê Dêrsimî bêrê arê kerdene.
Haydar Işikî naye ser o va: “Jenosîd ke bêro xo vîr ra kerdene ya, şarê ma ancîya (onca) jenosîdo newe ver de maneno. Naye ra gerek ke ma jenosîdan ser o ke şarê kurdî rê amey kerdene, vinderîme. (…) Kam ke îmzaya xo hîna nêdaya, ma keyepelê www.dersimkatliami.com ser o silayîya îmzakerdişî danîme.”
