Destê Edîtorî ra:
Şarê kurdî heta nika her ca û îhtîmal de vengê xo vet û peynîya înkarkerdişî waşte. Kurdan waşt ke Tirkîya û Kurdîstan de biratîye û demokrasî bêrê ronayene. Labelê 30 serrî vîyart û çi demokrasî, çi biratîye ameye viraştene. Peynîya peynîye de ma dî ke bi propagandaya îdeolojîke ya kî populîzm û heyalperestîye ra neheqîye ra teber qet çîyê no welat de nêvejîno meydan.
Tirk, ereb û farsî kurdî înkar kenê. No suprîz nîyo, çike karê înan no înkarkerdiş de esto. No înkar ra nê dewletî dewlemendîya binerd a Kurdîstanî cênê xo dest, bi hêzê karî yo erjaye yê cêncanê kurdan ekonomîya xo benê raver û sîyasetê zere û teberî bi mesela kurdan manîpule kenê. Naye de înkarkerdişê kurdan tena sîyasî ya kî kulturî nîyo. Înkar xo ekonomî û artêşe de kî musneno. Cêncê kurdî metropolan jê (sey) Îstanbul, Tehran û Bexdad de seba ju (yew)-di quruşî gureyenê, miletê kurdî kî produktanê tirk ya kî farsan herîneno, pereyê xo ke peyser mendo kî keno Bankaya Tirkîya ya kî Îran. Bacî yenê destê hukmatê merkezî, uca ra kî ancîya (onca) benê vila. No sîstemê temsîlnêbîyayîşî de pere û hêzê kurdan yenê xebitnayene, labelê nasnameyê kurdan qebul nêbeno. Dormeyê kurdan çar hetan ra yeno girewtene, kurdî besenêkenê nefes bicêrê, her ca de sîstem ra asîmîle benê.
Feqet înkar tena tirk, fars û ereban de nîyo. Înkaro tewr girs hetê kurdan ra yeno kerdene. Merdim (mordem) ke konseptê “Komara Demokratîke” analîze bikero, vîneno ke tede xeylê heqê kurdan nênê dayene. Qiseyê sîyasetkaranê kurdan ke eslê xo de kurdan temsîl kenê, kî xeylê reyî heqê kurdan înkar kerdî. Mesela, serekê partîya kurde BDP Selahattîn Demîrtaşî demo bîn de vatîbî de wextê dewleta netewe vîyart û ronayîşê dewletanê neweyan êndî nêbeno – ey ra gore no kî seba şarê kurdî nîya r’ o. 200 şarê dinya besekenê dewleta xo birone, zonê (ziwanê) xo de weşîya xo biramê, dinya de cayê xo ekonomî, sîyaset û kultur de bicêrê, labelê seba kurdan naye nêbeno. Qiseyê Demîrtaşî nimûneyêde rind ê înkarkerdişo tewr xirab ê miletê kurdan o. Seba ke xeylê sîyasetkarê kurdî nîya qisey kenê, dewleta Tirkîya kî dayîşê heqanê kurdan lazim nêvînena. Qanûnêde tebîetî yo ke her can seba heqê xo mucadele bikero. Sîyasetkarê kurdî êndî naye kî bizanê û xo bi xo înkar mekerê. Sîyaseto populîst û tersê xoserîye, her dîyan (hur dimêna) benê sebebê gonîrişîyayîşê neweyî.
Des serran ra raver pisporanê sîyasetî vatîbî, eke kurdî nîya bi heyalanê biratîya şaşe û demokrasîya sextîye kay kenê, ê yenê asîmîle kerdene û peynîya peynîye de jê (sey) binkultur bîyayîşê xo ra dewam kenê. Henî aseno ke nê qiseyî rast vejîyay. Kurdan heta nika bi kayê demokrasî, biratîya şaran û çepgirîye wextê xo kerdo vîndî. Des serrî yo ke no têvereştişê demokrasî hepisxaneyan de qedîno. Sîyasetkarê kurdî yenê zere eştene, rojnamegerî yenê bêveng kerdene. Suc tena sucê dewleta Tirkîya nîyo, sucêde giran kî sîyasetê kurdan der o. Şar û dîasporaya kurdan heqê şarê xo keno xo vîr ra. La bi tayê protestoyan û çalakîya roniştişî parlamento de kurdî azad nêbenê.
Merheba, destê şima tern bibo ke şima nuşteyêde wina rast nuşto. Ez kî qet fehm nêkena, merdimo ke kurdkî nêzanbo çitur besekeno heqê kurdan bisevekno. Mi zaf kirdî dîyî seba ke zonê xo nêzanê duştê perwerdekerdene ziwanê daykê zî vejînî.
nika no nuştayê edîtorî de cer ra cor boya kemal burkayî yeno. na hîrîs serra ke kurdî ser lingan de yê. no sereweradyîş heta nîka zaf mehele ra vîyart. ez fîkrê vajî ke na xete de ma yewbînan bigirotêne dewlete rewna heqê bidênê. la ma xeta kemal burkayî ya şaş ra şîrê se willahî ma evare benê. nika dîyarbekir de şar bi ey ra yarîye (alay) keno. şar ey ra vano “bir kedisi bile olmayan meclissever adam” ma xo nêxapen seba no no ziwan û no şarî kam tekoşîne kerdo bellî yo. bela kemanîyî înan estê la bê înan şar bawerîya xo kesî ra nêkeno. no fikrê şima ma diyarbekir de weçînayîşî de rone des heb ray ra zêde nêgêno.
Demokrasi u Hastiye rinda, labele înkarkerdîse jü welat u dewlete demokratîk nîyo. Yanî înkarkerdîse Demîrtas demokratîk nîyo. Hete bînrak gerekeke Kurdî endî na sîyaseta kana “antî-emperyalîst” terk kere. Her cade Amerîka yena protesto kerdene, no fîkr îye kamo, ezîk nizonen. Her kes zerre sare xo kero ke, be Amerîka, Almanya jü kolî na dînyade caye xora niwelîno. Amerîkay re dismenen Kurdîstan re dismenena…