Keyepel Nuştoxî ra Înîsîyatîfê Însananê Aqilmend û Biaqilan

Înîsîyatîfê Însananê Aqilmend û Biaqilan

1100
9

Hama-hama her kesî aştîye û çareserîye ra fek verdaybî ra û goş naybî ra lîsteya nameyanê însananê aqilmend û biaqilan ser. Raştî kî miletî na lîste zaf meraq kerdêne. Ha şima rê lîsteya nameyanê însananê aqilmend û biaqilan. De kerem kerê gelê axayan û gelê began naca ra tafîyê!

Sere de naye her kes rind bizano ke her kes qasê xo rind o û qasê xo kî biaqil o. Heqa ma kî xo ra çin a ke ma vacîme felan kes rind o, bêvan kes xirabin o. Nameyê ke na lîste de ca gureto, mordem nêzano ke nê nameyî goreyê çinayî û goreyê kamî na lîste de ca gureto?

Kifş o ke na lîsteya aqilmend û biaqilan Erdoganî bi hukmatê xo pîya kerda hazir. Yanî Erdoganî însanê ke der û dormeyê AKP de heşîr û neşîr ê, zafîne nameyê ê însanan guretê û kerdê lîsteya xo. Yanî kesê ke şodir ra hetanî şand bi qelema destê xo pesna hukmatê AKP danê, ê kesan ra na lîste ameya amade kerdene. Ez bi xo nê însanan zafîne nas nêkena. La na lîste de tayê nameyî estê ke dûrî û nêzdî ra tewr eleqa xo bi nê karî çin a.

Ez ke zana û bawer kena, însanê ke bi qedr û bi qîymet ê, însanê ke hêca yê, însanê ke vatena xo pere kena, însanê ke seba însanetîye xizmet kenê, însanê ke wayîrê bîr û bawerî yê,  însanê ke werteyê şarê xo de, werteyê qomê xo de wayîrê vatena xû yê, yanî şarê xo rê rayberîye kenê û pîyê feqîr û fuqarî yê, ê însanan ra vanê însano aqilmend. Qa her hal de her kesî ra kî henî nêvanê însano aqilmend.

Mordem ke qayîtê nameyanê lîste kerd, qet bêguman tayê nameyan de şaş û mat beno vindeno.

Helbet nê înîsîyatîf de însanê hêcayî û însanê rumetinî estê. Nînan rê vatena ma çin a. La Erdoganî giranîye da însananê der û dormeyê xo. Gere Erdogan ra bêrone pers kerdene ke qey elewîyan ra kes nê înîsîyatîfê însananê aqilmend û biaqilan de çin o?

Cewabê Erdoganî ke Îzzettîn Dogan o, elewî Îzzettîn Doganî tewr nas nêkenê. Çunke na kî nîya rind bêrone zanitene ke Îzzettîn Dogan elewî nîyo. Werteyê nê înîsîyatîfê însananê aqilmend û biaqilan de çi karê Îzzettîn Doganî esto û gelo Îzzettîn Dogan kamî temsîl keno? Çand mordemî bawerîya xo bi Îzzettîn Doganî anê? Çand mordemî vatena Îzzettîn Doganî der ê?

… ?

Aqilmend û biaqil ke Îzzettîn Dogan bo, way delîl halê aştîye rê. Ez henî kuna xo ver ke nê pîyayê nîyanênî bi nameyê elewîyan sîyaset kenê û reya xo kî benê danê MHP. Beno ke nê înîsîyatîf de MHP temsîl keno, la her kes kî naye rind bizano ke Îzzettîn Dogan elewîyan temsîl nêkeno.

Lîsteya ke Erdogan bi hukmatê xo hazir kerêne, ne ci ra lom beno ne kî tawa.  Adir ke gur, werte ke têmîyan ra mekerê, rind o. Oncîya kî seba miletî kancîye xeyr a, wa a bibo.

PARE BIKE
Wusênê Gestemerde
Wusênê Gestemerde serra 1971 de dewa Gimgimî Gestemerde de ameyo rîyê dinya. Serra 1990 ra nat Ewropa der o. Endamê Înstîtutê Ziwan û Kulturê Kirmancî (Zaza) ÎKK e.V. Berlînî yo û demê kî karê Komîteya Rayeraberdîşê Înstîtutî de bi hevalanê xo aktîf xebitîya. Serra 2000 ra nat ziwan û kulturê xo ser o xebitîno û bi kirmanckî (zazakî) meqale, hîkaye û şîîran nuseno. 2012 de Gestemerdeyî Xelata Edebîyatî ya Huseyîn Çelebî girewte.

9 ŞÎROVEYÎ

  1. Vajime listeya ajane mit u arabesk… Kamji dewlete meselay ewe listeya arabesk hal kerdo… No kayo kay… Kayo xirabin

  2. Birêz Bilusk,

    mordem bawerîya xo bi nê hukmatî tawa ano. Kayê nînan, dek û dolabê nînan tawa xelesîne. Xora serê nê kayê qilerînî kî Mûsteşarê Îstixbaratê Tirkiya(MÎT)yane Hakan Fîdan onceno. Êdî ê bînan kî şima bifikirîyê.

  3. Birêz Bertal,

    helbet bê aqil nêbeno. La bê vîjdan û bê merhametî kî tewr qet nêbeno.Ju însanî de ke vîjdan û merhemet çîne bî, biaqil bî se kena, biaqil nê bî se kena?

    Seba aştîye de birumete kî aqil, vîjdan û merhamet lazimo. Yane destê xoyo ju gere vîjdanê xo serno û destê xoyo ju kî gere binê kemere kerone…

    Eke esto înan de vîjdan û merhamet,

    mi ra gore, çareserîya na mesela de, honde qimetê na lîsteya aqilmend û biaqilan çîn a. Yane huhukmatê AKP Her çî vîjdan û merhamet çînê bî

  4. Wendoxê hêcayî,

    mi, bê zanitene şîroveyê xoyê corenî de xeta kerda. No semed ra kî qusir de nîyamedê.

    Şîroveyo raşt ano cêreno

    Birêz Bertal,

    helbet bê aqil nêbeno. La bê vîjdan û bê merhametî kî tewr qet nêbeno.Ju însanî de ke vîjdan û merhemet çîne bî, biaqil bî se kena, biaqil nê bî se kena?

    Seba aştîye de birumete kî aqil, vîjdan û merhamet lazimo. Yane destê xoyo ju gere vîjdanê xo serno û destê xoyo ju kî gere binê kemere kerone…

  5. Wusên bira;
    Nameyêke lîste de ca girewto ebe çi qeyde nusîyê.(?) Cewabê na perse to da yo.” ..însanê ke der û dormeyê AKP de heşîr û neşîr ê, zafîne nameyê ê însanan guretê û kerdê lîsteya xo.” Ya. çi vacîme. Her hes verê koçikê xore çarnêno ra xo. La ma bi çime îlme sîyasetî ro qaytê na mesela bîkême. A taw çîyede heqîqet anîmê wertê.
    Na mesela de aqilmend û biaqilan ebe çi bipenîme?(ölçme) Ebe çime AŞTÎye. Aqil û fam û fêresetê nê namzeta çixa koka û bingêhe ne çîya sero dewlemend o? Ju be ju na qeyde şikînîme ceser vecîme… Silam û rez.

    • Bira m seyîtalioglu,

      Aqil nîpenîno, sencnîno 🙂

      Faqat, hetê Dersîm de ju metodo zaf rehet esto: perskene vanê “hala ti ke zona here kotî ra fisa xo kene?” :-))

      • Birêz Bertal,

        vatena to raşta, la birêz M. Seyîtalîoglu ez bawer kena na çekuya peymitene a mana de nêvata. Seba însananê înîsîyatîfî vata.

        Sentiş (n):tartma

        Peymitene: ölçmek

  6. Birêz Mehmet Seyîdalîoglu;

    Ma kî zê her kesî bê omid nîme. Omid esto. La ez honde bawer nêkena ke nê înîsîyatîfê aqilmend û biaqilan ra çîye vecîyo. Yane seba çareserîya na mesela honde hukmê xo çîn o. Qerar dayene û qerar girewtene kî hukmatê AKP dest der a.

    Keko Mehemet, wa ê verê koçike biçarnêra vekê xo, heqa feqîr û fuqarî kî rojê nê roje pirnikanê înan ra fîtîl-fîtîl êna.

    Silam û hurmet mi ra…

CEWAB BIDE

Please enter your comment!
Please enter your name here