Keyepel Nuştoxî ra Îlhamî Sertkaya Ilhami Sertkaya – YA BİYENE, YA ÇİNİBİYENE

Ilhami Sertkaya – YA BİYENE, YA ÇİNİBİYENE

245
0


Vınde bıra.

To ra vana. Xezebo ke amo serê ma, gıran o bıra. Qılêriya inkar u asimilasyoni, ma kerdê verê vayê xo, zê masuyanê zerê awe, ercenê tewer.

Ju be ju, dewe be dewe, şuke be şuke, vindi benime.

Masu ke awe ra tewer bo, mıren o.

Masu ke merd, dışmenê awe, reseno mıradê xo.

Vınde wayê.

Vınde vatê mı est o to ra.

Tı malıma kamiya?

Tı zaneyê kamiya?

Xırabiya ke ma ra ama, tı fam kena?

Tı ke fam kena, verba na xırabiye vındena?

Tı zanena seba ju şari ‘biyene’ çık a?

Zon o, wayê zon o.

Seba ju şari ‘biyene’ zon o, bıra zon o!

ZON KE ME BO TI ÇİN A.

Zon ke bıqediyo, ma qedinime.

Ne kamiye, ne kultur, ne edebiyat, ne tarıqe, ne welat nêmaneno.

Ma ez se bıkeri naye ra tepya na dınya?

Na dınya de ke zonê mı bıqediyo, komel u momeli, kar u barê şari, şahiye u şênatiya şari ez se bıkeri, mı ra çı?

‘Emperyalizmi’ niya kerd o, ‘Qapitalizmi’ niye kerd o, ‘Oligarşi-moligarşi’ mı ra çı?

Ez ke çini bi, biyena şari mı ra çı?

Ez ke çini bi, dınya, parti u martiyi, alım u malımi, Tırki u mırkiyê şıma se bıkeri?

Dewleta ke ma ra tehamul nekena, ‘demoqratik’ bo ke mı ra çı?

Şaş me bê!

Şaro ke zonê xo de meşıkiyo qesi bıkero, şaro ke ebe kamiya xo serbest me bo, heq u huquq seba ê şari nêbeno.

Zonê Fransan ke çinibiyêne, dewleta Fransan biyêne?

Zon ke mebiyêne, Tırkan biyêne wayirê dewlete?

Verde zon, dıme ra serbestiye.

Zon ke çini bo, serbestiye çin a.

Şıma na rastiya gırane rınd zanenê.

Hama şıma tenya ‘zanenê’.

‘Tenya qaşo zaneyê’! şıma ‘canê ma werd’.

‘Tenya mezanê’, zaneyê xo biyarê ca.

Çıyo ke şıma zanenê, vırazê.

Ya ki vacê ‘de tawa nêbeno, ma bıqedime şıme’.

Raya hirıne çin a.

İnam bıkerê, bawer bıkerê, raya hirıne çin a.

‘Ezo budalaye heqi’ şıma ra vaci.

Vengê mı heşênenê, nêheşênenê, şıma u wijdanê xo.

Goşdariya mı kenê, nêkenê, şıma u merametê xo.

No, ne siyaset o, ne mobet o, ne hobiyo, ne kay o.

Na, ne şanık a, ne çirok a, ne mesela ‘Fatfatık a’.

Na, raste rast, biyene u çinibiyene wa.

Kes xo mexapno, mevaco ‘Ma nêqedinime’.

No bar, kewto vılê ma.

Ya ma nê bari ancenime, ya ma ercenime.

Ya asimilekarê gewendi ma qedênenê, ya ma nê mantıqê gewendi qedênenime.

Her çi destê ma de ro, her çi gırêdayê ma wo.

YA BİYENA MA, YA ÇİNİBİYENA MA.

PARE BIKE
Îlhamî Sertkaya
Îlhamî Sertaya Çewlîg ra yo. Dewa xo Pîrcan (tirkî: Adaklı) girêdayeyê Azapêrtî yo. Perwerdeyê xo Îlhamî Sertkaya enstîtuya malimî ya Çewlîgî de dî. Serranê 1970-1980 de malim bîyo, 1982 welat terk kerd û şî Ewropa. Îlhamî Sertkaya ewro nuştox o, kitabê ey hem bi tirkî hem kî bi kirmanckî û kurmanckî (kirdaskî) estê. Hîrê reyî endamê jurî yê Xelata Edebîyatî ya Huseyîn Çelebî bî. Giranîya eseranê Îlhamî Sertkayayî şîîr û roman ê.