Nuştoxo kirmanc Îlhamî Sertkaya romanê xoyo neweyî “Sosine û Gulîzare” vet. Serrîpelê no roman de Îlhamî Sertkaya nîya nusneno:

Xem û xeyalê bêbinî, dem û dewranê serdin û germinî, kewtîbîy têmîyan. Sosine, rasta kî ê birrîyo ke dormeyê ci adirî girewtîbî ra, bi koma xo, bi Xalî, Gule, Silêmanî, bi pêro hevalanê xo yê gerîlayan, mabêne barut û zinginîya top û tufangan ra vecîyabîy, amabîy na sûke. Ê vinetîbîy, Sosine û koma xo qesî kerdêne. Ruyê înan ra hesreta sed serran, huyayîşê tarîxê welatî vila bîyêne.Dot ra, vengê çepikan, vengê şên û şênatîye amêne.

A şênatîya ke verba newroz û verba wisarî xo xemilnabîy. Sîndorê dûrî û nêzdî têmîyan de vîndî ra bîyêne. Koyî dêm dîyêne, rayan kemerê xo şiknêne. Tîje tanya xo, zê yew cinîka dixazkana ke weledîyêne, giran-giran, perda dejê sed serran dirnêne, lêlê şodirîyê neweyî de vatêne ‘ma bixeyr’!. Ters û teresîye şikîya, ‘ma bixeyr’! Hesin û xeleka koletîye şikîya ‘ma bi xêry’! Neçarîye, nezantîye şikîya ‘ma bixeyr’! Binişîyê astoranê zerreyê xo ra, verba serbestîye biramê, kêberê serbestîye aseno, biqîrê, dinya aleme wa biheşno, vajê ‘ma bixeyr’!

Nuştox: Îlhamî Sertkaya
Sernuşte: “Sosine û Gulîzare”
Weşanxane: Vate
Ziwan: Kirmanckî (Kirdkî, Zazakî)
436 rîpelî
ÎSBN: 978-975-6278-72-7

2 ŞÎROVEYÎ

Comments are closed.