Resim: James Cridland

Fuarê teknolojî yê dinya ÎFA 2011 de ke aşma êlule de Berlîn de yena viraştene, ancîya (onca) xeylê produkê neweyî yenê musnayene. Zîyaretkerdoxî fuar de înovasyonanê neweyan ê dinyaya teknolojî vînenê.

Çîyo ke bala xeylê eleqedaran nika ra ante (onte), komputera 3D bê verçimikî ya. Fîrmayê Japonya Toshiba bi modelê xo yê “Qosmio F350” komputurêda newîye vet pîyase. Merdim (mordem) ekranê na komputure ser o besekeno resim û vîdeoyê 3D (hîrê dîmensîyonal) seyr bikero – bê ke verçimikanê taybetî xo ser no. Eyarê 2D û 3D kî mumkîn ê. No hamnan ra tepîya komputura 3D bi fîyatê 1.650 Euroyî yena rotene.

Şîrketê komputuran Apple û fîrmaya televîzyonan Loewe nika ra kî pîya gureyenê. Bi çîynermanê neweyan ê iPadî ra naye ra tepîya fîlmê Înternetî kî televîzyonê markayê Loewe sero qayît benê. Bi applîkasyonê VîdeoNet App ra fîlmî komputura destan (“tablet”) iPad ra rehet bar benê bi televîzyon.

Emser heto bîn ra fokusê înovasyonanê teknîkî smartphone (telefonê destan ê modernî) û tablet (komputura destan) ser o kêmî yo. Çi esto ke pisporê teknolojî komputura destan de pîyaseya ameyoxe vînenê.