Delegasyono mîyanneteweyî yê weçinitişî ke şaristananê kurdan de weçînitiş teqib kenê, raporê xo de da zanayene ke xeylê cayan de hîleyî amey kerdene.

  • Dêrsim: Delegasyonê Îtalya raporê xo de nuşt ke tayê dewanê Pilemurîye de nêameyo verdayene ke ferdê famîlyaya xo bêrê leyê kokiman. Pulur de serekê sindoqe her rey problemê veto ke dewijî raya xo medê. Xeylê taxanê Dêrsimî de pisûlayanê weçînitişî de cayê ke tede nameyê Ferhat Tunçî estbî, hetê tayê CHPyijan ra ameyo birnayene û nîya pisûlayî şarî rê bîyê vila. Seba ke dewijan nameyê Ferhat Tunçî pisûla de nêdîyo, ê şîyo gerre kerd. Nimûneyê pisûlayan amey teslîm kerdene bi avûkate Helîn Kuloglu.
  • Wan: Delegasyono alman vat ke sûka Wanî de tayê muşahîdî amey piro dayene, tayî kî amey berdene bi qereqol. Polîsî kî sindoqan ra dûrî nêşîyê.
  • Bidlîs: Heyetê almanî da zanayene ke Bidlîs de înan besenêkerd ke bikuyê zereyê mekteban, serekê sindoqan û eskeran destûr nêda. Lîseyê Îmam Hatîpî de kî ju (yew) sindoqe bê muhrî ameye dîyene. Dewanê Muzîk û Karaboyî de kî serekê sindoqe weçînitioxan rê pêşnîyaz kerd ke raya xo biderê AKP.
  • Erzirom: Erzirom de delegasyonê Fransa besenêkerd ke şêro zereyê mekteban û hetê polîsî ra ame tehdîd kerdene.
  • Çewlîg: Delegasyonê îngilizî rapor kerd ke dewa Saban de qomutanê qereqolî leyê sindoqe de nişt ro û her ray raver ra kontrol kerdo.