Keyepel Nuştoxî ra Îlhamî Sertkaya HEYA, HEYA! Tİ EBE TİRKÎ ‘BİDİRNE ERO’!

HEYA, HEYA! Tİ EBE TİRKÎ ‘BİDİRNE ERO’!

387
2
Merik ronîşte bî. Ma vîst serre ra tepya, juminî dîyêne. Vîst serre ra ver zî ma ke qalê Kurdistanî kerdêne, se ke destê xo bigino adir ra, henî ‘uf-kuf’ kerdêne, ma ra bi Tirkîyê xo vatêne ‘mîlîyetcî’ û şîyêne. O waxt (wa name vindo) çepê Tirkan de bî.
O, wayîrê ‘medenîyetî bî’! Ma ‘tepya’! bime.
O, ‘zaneye b’i! Ma, ‘nezan’ bîme
O,’entel bî’! Ma ‘cahîl’ bîme
Axir  ‘enternasyonalîstîye ra’ bigime, heta ‘ewren û dewranîst’ bî! Çi nêzanitê ke! Rojê Afrîka de ‘faşizmî dêm dêne, roja bîne Amerîka de ‘emperyalîzmî dêm dêne’! Ma ra qalê welatanê kolonyalan kerdêne, qalê kolonyalîstan kerdêne, qalê ‘heqê qederan tayîn kerdene’ kerdêne. Che Guera ra bigê, Mao ra, Deng sîao Ping ra, Amîral Kabral ra, Ho şî Mîng ra bige, heta Klara Zetkîn, Rosa Luksemburg….
Dostoyevskî ra bige, heta Troçkî, Narodnîgan, Kauskî, Stalîn, bê şik Marks, Engels ….
Seba Dinya Aleme demokrasîye, serbestîye, heqê dewlet bîyene wastêne, eke  qesa amênê Kurdistan ser o, ney!
No, ‘guna bî, na mîlîyetcîye, nîjadperestîye’! bîye.
Vîst serre mabênde vîyartbî, na vîst serre de, şuyananê koyan heqê Kurdan û Kurdistanî zanit bî, la no ‘roştîbîr, no biaqil, no ‘wayîrê medenîyet û zaneyî! Hîna bi Tirkî kerdêne ‘pilta-pilte’.Tayê îngîlizkî, Franskî misa bî, la tek çekuye Kirmanckî nêmisabî.
Kurd bî, bîbî Tirk. Alewî bî, bîbî Ereb. Sosyalîst bî, bîbî ‘kosyalîst’. Mevajê ‘kosyalîst’ çik o. Der û dormeyê xo de qayt bikerê, kamî ke bi Tirkî şima ra va ‘dîlimize sahib çıkalım’ la o bi xo zî ‘sahib’ nêvecîno, tek çekuye zonê xo nêzaneno, ê ‘kosyalîst ê’.
Axir no ‘kosyalîstê ma’ ancîna qesî kerdêne. Qesa xo ‘cêr û cor ra’ girot, ancîna ‘çend welatan de ‘faşîzm ke dêm da’!  Bi Tirkî ke zor ame ci, nê sloganan eşt;
-Yoldaşlar, ezilen Dinya haklariiii…
-Ezilen halklar kardeştirrr….
-Kapitalist moderniteee……
-Kadın haklariiiiii….
-Somurulenler kardeştirrrrrrr
Tiiiiiiirrrrrrr…!
Eke qesa xo bi arax qedêna, ma huyayîme û mi ci ra naye tenya va;
‘HEYA-HEYA! EBE TİRKÎ ‘BİDİRNE’ ERO!
Ma ez se bikerî? Ez ci ra vajî çi?
Ebe zonê asîmîlasyonî, ‘zaf dirnenê, zaf’!
Hêyf!
Eke ‘faydeyê xo esto’, ez şima ra tarixe de, di numuneyan bidî.
1-Waxtê sarebezkena Şêx Saîdî de, îxdam kerdena 47 Kurdî ra qerar dê.Vênenê ke 46 kes ê, juyê fîrar kerdo. Xebere ruşnenê Anqara ra. Anqara vano ke ‘ju Kurdî şuke de bigêrê, 47  tam bo, îxdam bikerê’!Şuka Amedî de ju Kurdî gênê benê hepis. La nı Kurd, qet eleqedarê xo, Sareberzkerdene ra çîn a.  Xebere danê Anqara, vanê ke ‘ ma ju Kurd şuke ra girot, ard, la qet eleqedarê xo sareberzkerdene ra, çîn o, Şêx Saîdî zî qet nas nêkeno, ma se bikime?’. Anqara pers keno, vano ‘No Kurd, Tirkî zaneno?’ Vanê ‘Ney, nêzaneno’. Anqara vano ‘Eke Tirkî nêzaneno, îxdam bikerê’.
Şima mesaj  û maneyê naye fam kerdî?
2- Serrê 1970 an de, sîyasetmedar û şoreşvanê Kurdan, Amed de, makeme de îfade danê. Dadger û ê, zonê Kurdî ser o, munaqaşa kenê. Axir dadger penîye de naye vano;
‘’ Şima Tirkî qisey bikerê, eke wazenê ma ra kifir zî bikerê, muhin nîyo’’
Şima nê mesaj û maneyî zî fam kerdî?
Eke şima fam kerdê, ê ‘biaqilê ma yê’! Ke qet zonê xo nêzanenê, tenya Tirkî qisey kenê, nusnenê, înan ra zî vajê. Vajê ke ‘Medirnê, medirnê’ Hêyf o’!
( De ma ameyîme serra newîye. Serra şima wa newîye, bi kêyfê şima bo. Kar û barê şima ra serkewtene wazena ez)
Îlhamî Sertkaya
2-1-2014
PARE BIKE
Îlhamî Sertkaya
Îlhamî Sertaya Çewlîg ra yo. Dewa xo Pîrcan (tirkî: Adaklı) girêdayeyê Azapêrtî yo. Perwerdeyê xo Îlhamî Sertkaya enstîtuya malimî ya Çewlîgî de dî. Serranê 1970-1980 de malim bîyo, 1982 welat terk kerd û şî Ewropa. Îlhamî Sertkaya ewro nuştox o, kitabê ey hem bi tirkî hem kî bi kirmanckî û kurmanckî (kirdaskî) estê. Hîrê reyî endamê jurî yê Xelata Edebîyatî ya Huseyîn Çelebî bî. Giranîya eseranê Îlhamî Sertkayayî şîîr û roman ê.

2 ŞÎROVEYÎ

  1. Yahudî y 1000 serrîra tepîya amey xo ser. Qederê Kirmancîk destê xo dero. Labelê hata ke îdeolojî ra, karê sarê bînîra ma besenikerd destunê xo bioncime, no made beno 2000 serre. Rayê Serok Barzanî tewr raya rasta seba Kirmancu, raya Bakur çi hefyo ke her roze tenena beno tewerte, raxelasiyayisê neyîk virastisê bone ma yo. Ferda Cetin o roze erzeno vano, Ulus Devleti rijiya, mare ju numune bimisno ke mak ey bawer bikerime, ok bizenoke hata nika ju dewletê netewî hona nirijiyo. Yanî hata ke hukm destê destê merdiminê niyanen de bi, waxt seba asîmîlasyon gureyeno. Simare silamune germune welat rusnen.

  2. Bira Xozat;
    Ma Yahudîyan numune nêgirot, bîme dişmenê înan. Bê şik, îta de xeletîyêde zaf giran esbî. Çi ke ma binê tesîrê çepê Tirkan de bîme.Nika zî halê ma meydan der o.Ê yê ke ma ra dişmenîya Yahudîyan misna, pêro bîyê asîmîle, kamîye û zonê xo de durî kewtê.
    De ma ra quwet bo!
    Seba silamê xo, weş be. Nameyê to zî, Xozat ano mi vîr re. O Xozato ke ez ju serre tede menda û mi vîre ra nêşeno.

Comments are closed.