Heyyy felek, xayîn felek!
xizmetkarê bêbext û xayînan
to oncîya ma veşnayîme
to rê û bêbextan rê kî na nêmana
oncîya kezebe re ma kerde lete-lete
Entep de kî merdîme
Entep de kî ameyîme kîştene
Entep de kî bi qerqeşunanê bêbext û xayînan gunayîme war o
Kuçeyanê Entepî de canê ma bî lete-lete
royê ma bî hurdî-hurdî
gonîya ma dilope bi dilope rişîye
mayî lornenê, domanî berbenê
wayî zîbenê, birayî nalenê
dayikî şîn û şiware der ê
vengê merdene beno berz kuçeyanê Entepî de
vengê berbişî
vengê şîn û şiware beno berz kuçeyanê Entepî de
û Entep birîndar o

Heyyy felek, xayîn felek!
no çi zulm o?
no çi hal o?
Entep birîndar o
birîna xo zaf xorî ya
û êdî derman nêcêna
birînî ziqitnenê
birînî jan danê
birînî kul ê

Heyyy felek, xayîn felek!
to oncîya dest re dişmenî kerdî hene
to oncîya dişmen kerd şad
bêbextî binê lewan ra hunê
bêrê qatî kerê ke
dejo ke ma dano berbiş
bêbextan rê beno huyayîş,
keyf û eşq der ê pêro
vateyê xo û qeseyê xo pêro zur ê…
di rîyê xo û hezar zurê xo estê
alavere û dalavereyê xo nêxelesîno
bi destanê terorîstanê DAÎŞ
ma kişenê, ma qir kenê
bi terorîstan têvirane der ê
û bi terorîstan têdest der ê

Heyyy felek, xayîn felek!
no qetlîamo çendin o?
na reya çendin a ma mirenîme?
û hona çend reyê bînî mirenîme?
Amed
Anqara
Pirsûs
Entep… bes nîyo?

Heyyy felek, xayîn felek!
xizmetkarê bêbext û xayînan
êdî bes o, bes!

PARE BIKE
Wusênê Gestemerde
Wusênê Gestemerde serra 1971 de dewa Gimgimî Gestemerde de ameyo rîyê dinya. Serra 1990 ra nat Ewropa der o. Endamê Înstîtutê Ziwan û Kulturê Kirmancî (Zaza) ÎKK e.V. Berlînî yo û demê kî karê Komîteya Rayeraberdîşê Înstîtutî de bi hevalanê xo aktîf xebitîya. Serra 2000 ra nat ziwan û kulturê xo ser o xebitîno û bi kirmanckî (zazakî) meqale, hîkaye û şîîran nuseno. 2012 de Gestemerdeyî Xelata Edebîyatî ya Huseyîn Çelebî girewte.

CEWAB BIDE

Please enter your comment!
Please enter your name here