Grûba Xebate ya Vateyî kombîyayîşê xo yo 29. Dîyarbekir otela Mîtannîa de viraşt. Kombîyayîş 27. hezîrane roja dişeme saeta 9 de dest pêkerd. Roja 30. hezîrane saete 16.00 de qedîya.

Roja dişeme saeta 9.00 de endamê grûbe ra kesê ke cayê cîya-cîyan ra amebîyî, odaya kombîyayîşî de cayê xo girewtê. Sey her kombîyayîş, serekê kombîyayîşan Munzur Çemî verê cû kesê ke ameyê û kesê ke nêameyê, ê tesbît kerdî. 25 endaman ra 20 kesî beşdar bîbîyî.

Verê, seba çar rojan rojeve û seba rojane zî programê wextî virazîya. No program û rojeve de şeklê xebate û saeta werdî û wextê mabênan ame tesbît kerdene.

Babeta nê kombîyayîşî termê beledîya bî. Nê termî hetê Beledîyaya Bajarê Girdî ya Dîyarbekirî, seba ke tirkî ra biaçarîyê kirdkî, amade bîbî û pêşkêşê grûbe kerdîbî. Babeta kombîyayîşê 28. zî nê termî bîyî. Wina aseno ke grûbe do di kombîyayîşanê bînan zî nê terman ser o bixebetîyo. No kombîyayîş de 306 termî yê Mudirîya Pêroyî ya ÎAKD (Îdareyê Awe û Kanalîzasîyonî yê Dîyarbekirî)  û 80 termê îtfaîya yê ke kombîyayîşê 28. ra mendbî, pêro-pîya nêzdî 400 termî tirkî ra açarîyê kirdkî.

Sey her kombîyayîş, no kombîyayîş de zî ge-ge munaqeşeyê zaf sertî virazîyê. Çunke zafê nê terman bi ziwanê xerîban bîyî. Nê terman ra çend nimûneyî: “Portatîf sedya, radyoaktîf patlamalar, sepetlî kaldiraç, simulasîyon” ûsn. Verê cû zî Beledîyaya Bajarê Girdî ya Dîyarbekirî piştî dabî grûbe û no kombîyayîş zî bi destekê na beledîya virazîya.

Roja peyêne, yanî 29. hezîrane de, bi temsîlkaranê beledîya reyde werdê nêmrojî ame werdene û bi nê temsîlkaran reyde kombîyayîşêko şenik zî virazîya. Kombîyayîş de verê mabênê endamê grûbe û nê temsîlkaran de daşinasnayîş virazîya. Nê daşînasnayîşî ra dima Mudirê Nuştegehê Xususî yê Beledîya Zulkuf Karatekînî qisey kerd. Karatekînî seba na xebate grûbe rê sipas kerd û bi kilmî pesmê xebata grûbe da. Dima zî grûbe ra çend kesî bi kilmî qisey kerd.

Peynî de sey her kombîyayîşan demê ameyoxî ser munaqeşeyî virazîyê. Di embazê bînî seba endamitî pêşnîyaz bîyî. Bi qeraro pêroyî endamitîya Uxur Sermîyan Û Pinar Yildiz ame qebul kerdene.

Mehmûd Nêşite/DI

PARE BIKE
DêrsimInfo
DêrsimInfo keyepelê kirmanckî yo ke serra 2010 de kewt fealîyet û xizmetê xo atraktîfkerdiş, raverberdiş, geşkerdiş û vilakerdişê kirmanckî (zazakî) de tarîf keno. Aye ra teber DêrsimInfoyî xo rê hedef kerd ke zaffikirîye û zafrengîya komelê kurdan temsîl bikero.

CEWAB BIDE

Please enter your comment!
Please enter your name here