Destê Edîtorî ra:

Her ca de, mîtîng û pêserameyîşan de, rojname û Înternetî de qalê asîmîlasyonê kurdkî, bitaybetî tehlukeyê vîndîbîyayîşê kirmanckî (zazakî) duştê tirkî de beno. 30 serrî yo ke zon, (ziwan), kultur û îtîqadê Dêrsimî pelixînê, binê asîmîlasyonî de nalenê. Vanê, eke nîya dewam keno, des serran de Dêrsim axir beno yê vizêrî. Vanê, kes kirmanckî rê ehemîyet nêmusneno. Merdim (mordem) ke programê festîvala Mizurî de nîyadano kî ju (yew) sebebê naye vîneno.

Emser 28. temmuze de Festîvala Mizurî reya 11. dest kena ci. Na rey kî yeno dîyene ke rexneyê ke par û pêrar amey kerdene, bala organîzekerdoxan nêante (nêonte). Emser kî xeletîya serranê peyênan dewam bena: festîvale seranser bi tirkî ya. Seba ke xizmetê Dêrsimî bi zonê (ziwanê) xo karêde zor aseno, emser tena tayê kilamê kirmanckî estê, çîyê bînî bi tirkî yenê viraştene. Yanî, Festîvala Mizurî de festîvala zon (ziwan), kultur û îtîqadê Dêrsimî ney, reklamê îdeolojî û partîyanê ke faydeyê xo dêrsimijan rê çin o, yeno viraştene.

Îdeolojîya zonî (ziwanî) çin a. Raver gerek no zon (ziwan) bêro raxelisnayene ke dime ra îdeolojîyî no zon (ziwan) de bêrê munaqeşe û propaganda kerdene. Dêrsim û dewlemendîya xo hetê çepgiranê tirkîstan ra zaf ant (ont). Na nêweşîye 30 serrî ceribna ke propagandayê sosyalîzmî bi tirkî bikero, nika na hîna dewam kena. Êndî gerek merdim (mordem) fehm bikero ke problemê Dêrsimî îdeolojîyî nîyê, problemê ma vîndîbîyayîşê zon (ziwan), îtîqad û kulturê ma yo.  No semed ra gerek ju (yew) festîvale ke jê (sey) festîvala kulturî ya Dêrsimî name bena, kî Dêrsim bi zon (ziwan) û zagonê xo temsîl bikero. Gerek na festîvale de hîrê rojan de her çî bi kirmanckî bêro viraştene. Şoreşê Dêrsimî sosyalîzm nîyo, zonê (ziwanê) ma qiseykerdiş o, zon (ziwan) raxelisnayîş o.

Pêro panelan de, hetta pêşangehan de, zon (ziwan) tena tirkî ya. Ma organîzekerdoxî dînamîkê vîndîbîyayîşê zonê (ziwanê) ma qebul kenê? Eke henî nîyo, Dêrsim de çayê zonê (ziwanê) ma nêno xebitnayene? Kurdîstan de kurdî nimajanê xo bi xutbeyanê kurdkî virazenê, hama ma Dêrsim de panelan de bi tirkî derheqê elewîyîye de qisey kenîme. Çayê îtîqadê ma bi kirmanckî nêbeno? Kokimanê ma vatêne, zonê (ziwanê) ma zonê (ziwanê) Xizirî yo. La îtîqadê Dêrsimî ke bi tirkî yeno viraştene, Xizir kî bêzon (bêziwan) maneno.

Heto bîn ra muhtewaya programî de kultur hende çin o. Tede reklamê fraksîyonanê qijkekan ke heta nika riskê Dêrsimî werdo, esto. Program de kulturê Dêrsimî ney, nameyê nê partî û fraksîyonan reklam benê. Nê fraksîyonî festîvalanê Colemêrg, Wan, Tabzon, Tekirdag ûêb. de qet çin ê. Labelê Dêrsim bi înan ra pirr o, seke ê wazenê Dêrsim seba name û propagandayê xo bixebitnê. Program de hende kilmnuşteyê nameyî estê ke, merdim (mordem) ci ra şaş beno:  DAKAD, HÖC, EMEP, DHF, DKH, Partîzan, YDK, ESP, ÖDP, HKM, HC… Pardon, na festîvale kombîyayîşê fraksîyonanê çepgiran bî?

Êndî her kes şêro ser ke kulturê Dêrsimî tena bi vatişê tayê kilaman temsîl nêbeno. Çi fayde eke kilamî kirmanckî yê, la panel, moderator û qiseykerdişî bi tirkî yê? Ma ke zonê (ziwanê) xo rê wayîr nêvejîme, nêzdî de ne kultur ne kî zonê (ziwanê) Dêrsimî maneno. O wext kî viraştişê festîvale nafîle yo. Tayê fraksîyonê çepgirî ke amey Dêrsim û qisey kerd, no bes nîyo. No nîya nêbeno. Gerek Festîvala Kulturî ya Mizurî kî kulturê dêrsimijan temsîl bikero, gerek festîvale vengê dêrsimijan, rengê dêrsimijan bo. Emser na festîvale festîvala kulturî ra zîyade bîya festîvala îdeolojîyan. Henî aseno ke organîzekerdoxan par û pêrar goş ro şarî nêna. Labelê gerek ê cewabê nê rexneyan bidê û bala xo waştişê şarî ser bidê.

3 ŞÎROVEYÎ

  1. Dest û payê îderekerdoxanê ‘dersiminfo’ wes bo. Rexneyê xo zaf rast î. Nê vateyan sero hînî mordem se vajo? Êyê xo ra vanî ma dersimij î, wa kilawa xo xo vernî û bifikirîyî.

  2. Ez redaksiyone Dersiminfo re wes be van, ez vazen ke ju roze sima de berine telewe u sima naskerine. Haka sima esta, kilamvatis kirmanckiyo u qisey kerdis tena tirki yo. Endi her kes bi radikal mezge xo de sorese ney virazo. Kilame kirmancki wese, labele eke deyrbaz werte kilamine xode tirki qisey keno, mordem sas beno. Nika mesela zof girana. Huseyin Aygun ik vijer Mamekiye de rexne kerd vat ke no festival iye Dersim niyo. Haka ey na rexne da cina, cike na festival de tena deyrbaze Dersimi este. Plame ey her ci kritik kero ke raye xo rakero. Niyete ey rind niyo.Labele ez zonen ke niyete Dersimnfo rindo, heka Dersiminfo k esto na rexnede cike zone Dersiminfo kirmancki yo. Eke Dersiminfo tirki qisey kerdene, heka Dersiminfo cine biyene. Ju fikre mino, fikre redaksiyone sima eke tirki u ziwane bini de bibo, rind beno. Gerekeke cence maye ke hona zone xo nizonene, ney fam kere.Programe Festival de gerekeke nameye fraksiyoni niyamo nuste kerdene. Endi ni fraksiyoni besemekere ke gama xo Dersim erze. Eke sosyalizm vazene kirmancki bikere. ETA k partiya sosyaliste biye, zone inu zone basku bi. Ci hefyo ke zone fraksiyone ma tek tirki yo. No ci halo emman emman….

  3. Birayene ma Festival de ma Tirkî ra bezar bîme.
    Her çî Tirkî bî. Çepgirî, BDP yî, cencî her kes Tirkî qisey kerd. Tîyatro ye çepgîrîk Tirkî bî. No hata qey sono, sas bîme mend me… Ez qerare xo guret, kam ke sîyaseta xo, sanata xo, hunere xo Tirkî virast, înur nikara tepîya dûr vinden. Endî beso. 

CEWAB BIDE

Keremê xo ra şîroveyê xo binuse
Keremê xo ra nameyê xo binuse