Her çî xerepîyo! Herb xerepîyo, sîyaset xerepîyo! Herb peyê beran de kewto destê kaykerdoxan. Domanê şarê ma canê xo danê, la dime ra peyê beran de kaykerdoxî pîya qerar gênê vanê “êndî bes o”!

Herb vindeno!

Seba çi? Seba entegrasyonî!

Reyna peyê beran de seba hesabanê qijkekan plan virazenê, reyna herb! Reyna domanê şarê ma mirenê! Seba çi? Seba entegrasyonî!

Herb çîyo ke şima pê kay kenê, nîyo! Herb seba ke vateyê Hesen û Husênî bibo, nîyo. Xeylê waxt o ke ezo belengaz vana ke seba entegrasyonî qet hewce nîyo mordem bimiro. Xeylê waxt o ez vana ke herb sey Kurdîstanê Başûrî, sey pêşmergeyan, sey serekê pêşmergeyan o ke ebe înan pîya cefa anceno, ebe înan mewzîyan der o, seba dewletbîyena Kurdîstanî yo.

Ez şima rê reyna fikrê xo zelal û kilmek vajî. Qebul kenê nêkenê, şima zanenê: Heta ke vate û serekîya Ocalanî de nêvecîya, PKK serkewte nêbena.

Seba ke ez nê fikrî der a, sebebî zaf ê. Kesê ke bê verhukm wanenê, vînenê, na rastîya zelale zanenê. Kesê ke xora verhukm ê, ne herbî fam kenê ne aştîye ne zî planê dewleta tirke. Murad Karayilan yew roportajê xo de vano ke: “Ma, seba ke gerîlayan tepîya antî, safîye, şaşîye kerde.” Tew! Şodirê to bixeyr bo!

Heta ke vate û serekîya Ocalanî de nêvecîya, PKK serkewte nêbena.

Şima heta ke vateyê Ocalanî bikerê na safîye, na şaşîye zaf kenê, keko! Ocalan çi wazeno? Şima ke mi ra pers bikerê: Ocalan tenya weşîya xo wazeno! No fikrê mi şima rê ecêb o, ez zanena. La se bikerî ke goreyê mi rastîya tuje nîya ya. Wa xwezîla ez şaş bîyêne, xwezîla fikrê mi xelet bîyêne. Xwezîla Ocalan tenya weşîya xo ney, dewletbîyena Kurdîstanî biwaştêne, wa mi xo bixapnêne!

Ez naye wazena. Wazena ke fikrê mi şaş bo.

Dewleta tirke, çi waxt ke canê xo waşt, Ocalanî seba menfaatê xo dana qisey kerdene. Seke heta nika 15 serrî yo ke kerd, dewam keno. 15 serrî ebe çilo-pilo nîya vîyartî. Ewro çîyo ke bi mane yo, çîyo ke zelal o Kurdîstanê Başûrî yo ke ver bi dewletbîyene şono. Omidê mi ewro no wo.

Endî şima û fikrê xo, şima û bi keyfê xo. La zereyê mi vêşeno. Domanê şarê ma mirenê. Kamî goşdarîya mi kenê ke? Xemê kamî yo kez ez nînan vana? Medyayê mi, televîzyonê mi, îmkanê mi çin o. Tenya fikrê mi esto.

De ez nika, ebe nê halî, xo rê a kilame vajî: Lawikê Metînê. Karabetê Xaço vano. Vengê bilure mi rê bes o. Şima ke wazenê bicerebnê, goşdar bê.

 

PARE BIKE
Îlhamî Sertkaya
Îlhamî Sertaya Çewlîg ra yo. Dewa xo girêdayeyê Azapêrt a (tirkî: Adaklı). Nameyê dewe kî Pîrcan o. Perwerdeyê xo Îlhamî Sertkaya enstîtuya malimîye de Çewlîg de dî. Serranê 1970-1980 de malim bîyo, 1982 welat terk kerd û şî Ewropa. Îlhamî Sertkaya ewro nuştox o, kitabê ey hem bi tirkî hem kî bi kirmanckî û kurmanckî (kirdaskî) estê. Aye ra kî dot Sertkaya senaryoyê tîyatroyî nuşt û tede kay kerd, ser o kî dersa kirmanckî da. Sertkaya hîrê reyî endamê jurî yê Xelata Edebîyatî ya Huseyîn Çelebî bî. Giranîya eseranê Îlhamî Sertkayayî şîîr û roman ê.

1 ŞÎROVE

  1. Duzgî bo Kurês bo xalo hurdimena hem PKK hem tirko xo sas kerdo. Yê ma devrimcî ye hama ê tirk onca bîye har. Cencê ma cisenê ma ra vanê tororîst merorîst hama gerîla kî rahat vindo nika waxte harb nîyo xalo

CEWAB BIDE

Please enter your comment!
Please enter your name here