Duştê Dollarî de Euro vejîyaybî 1,36 ser. Xeylê serran ra tepîya dovîzê Ewropa Euro duştê Dollarê DYA de vejîya 1,36 ser û bê serebûtê negatîfî raya xo heta 1,42 kerde ra. Xeberê derheqê krîzê Qibrisî de ke mezgê sermayegozaran kerd têwerte ro, pîyaseya dovîzî ser o tesîr nêkerd û bi no tewr berzbîyayîşê Euroyî dewam kerd. Hûmaranê neweyan ê konjunkturê Ewropa seba dovîzê Euroyî  vayêde rind bî. Îndeksê Menejeranê Herînayîşî hetê Spanya û Îtalya ra piştgirîya trendêde pozîtîf kerde. Reqemê negatîfî yê Fransa naye de muhîm nêbîy.

Di hewteyan de Euro duştê Dollarî de 1,32 ra vişîya û 1,36 ser o vejîya. Analîzê dovîzan musneno ke dovîzê Ewropa hewteyanê peyênan de zêde ame herînayene. Heto bîn ra duştê ekonomîya rind a Amerîka de na aşme tayê xeberanê negatîfan tesîrêde xirabin da sermayegozarîyan. Hasîlaya Welatî ya Xeyrê Safî ya DYA çêrekserra peyên a 2012 de bi 0,1 % bîye şenik. Pisporanê ekonomî verê texmîn kerdîbî ke na hûmara do 1,1 % zêde bibîyêne. No semed ra Euro duştê Dollarî de vejîya gila 14 aşman ser.

Texmîno ameyox 1,40 Dollar o. Eke Euro bi no trendo pozîtîf 1,40 vîyart, raya ci heta 1,42-1,45 rakerde ya. No taw (06.02.2013) îndeksê EUR/USD ancîya 1,35 der o.

(Resim: Yahoo)

3 ŞÎROVEYÎ

  1. Kam vano ke zone ma dayere nebeno, qedîyo, tengo, zone dewano? Çi rindek ke zone made serre her mevzu yeno nusne kerdene, çi rind, çi rindek.

  2. Ti xem meke Meymanê Usar! Vayê Kirmanckî, saya mordemê zê şima ra vila beno keko!

  3. Hesa birayeminê rind, saya mara ney saya simara wo ke no zon her roze tenena yeno qisey kerdene, beno rindek, beno standar, xo raver beno. Na dînya de her çi mumkuno, eke mordem koka xora mevisiyo.

Comments are closed.