Hêrişê dewleta Tirkîya ya dagîrkere kantonê Kurdîstanê Rojawanî Efrînî ser o na wo dewam keno û nika reşt roja xo ya hîrisine. Duştê pêro propaganda, hêrs, xezeb û adirvarnayîşî de Efrîn û leşkerê kurdî hîna xo ver ro danê û welatê xo teslîmê dişmenan nêkenê.

Bîlançoyê cengê Efrînî yê peyênî hema çin o. Her di hetî, seveknayoxî û hêrişkarî kî, hûmaranê cîya-cîyayan danê, coka mumkîn nîyo ke merdim rastîye tey vejo. La bellî yo ke artêşa tirke nêşîkîya erdê Kurdîstanî hende asan bicêro xo dest. Ma çok ronêna, no kî înan rê bîyo derd.

3 saetî bîyê 30 rojî

Propagandaya hukmatê tirkan a ke vato Efrîn hîrê saetan de fetih kenê, puç vejîyaya. Hîrê saetî bîyê hîris rojî û hîna peynîya cengî nêasena. Xora, des rojan ra dime eşkera bî ke pêro tank û teyarayan besenêkerd sînoranê Efrînî bişiknê. Çeteyê “Artêşa Sûrîye ya Azade” (ASA) bi seyan merdî, tankê verênî îmha bîyî û moralê kurdan nêxeripîya.

Goreyê melumatê YPG tewr tay 30 tankê tirkan, 10 wasitayê eskerî û di helîkopterî ameyê îmhakerdene. Artêşa tirke dorê 700 reyî hewa ra kanton bomba kerd û da-3.000 reyî bi tank û topan na pira. Dorê 400 reyî leşkerê YPG û yê tirkan kewtî tê. Sey netîce da-100 leşkerê kurdî bîyê şehîdî, bi seyan çeteyê ASA û bi desan leşkerê tirkî kî ameyê kiştene. YPG ra gore hûmara merdeyanê ASA û artêşa tirke dorê 800 a, la na hûmare hîna tesdîq nêbîya. Çi heyf ke rîyê bombardumanê artêşa tirke ra heta nika tewr tay 180 sîvîlî merdê, bi seyan kî bîyê dirbetinî.

Kurdîstan roja 30. de xo ver ro dano (Xerîta: syria.liveuamap.com).

Nika rewşe çitur a? Goreyê melumatê ke nika yeno, 37 dewan de pêrodayîşê duştê îşgalkerdoxan de hîna dewam kenê. Artêşa tirke hêdî-hêdî şona raver, labelê tayê dewanê sînorî ra teber hîna mintiqayêda girse îşgal nêkerda. Kurdî seba welatê xo danê pêro. Çi esto ke xeylê rojnameyê kurd û mîyanneteweyî rapor kenê ke artêşa tirke tayê cayan de çekê kîmyewî gurenayî.

Reya verên a ke YPG teberê Rojawanî de hêrişê mevkîyê tirkan kerd. Qirik Xan yê Xetayî de leşkeranê kurdan da merkezê îstîhbaratê Tirkîya (MÎT) ro û hewt leşkerê tirkî kiştî. Rîwayetan ra gore kî PYD û rejîmê Esadî yê Sûrîye peymane naya ro ke artêşa Sûrîye sînoran duştê Tirkîya bisevekno. Rojê ameyoxî do ma rê rastîya na xebere bimusîme.

CEWAB BIDE

Keremê xo ra şîroveyê xo binuse
Keremê xo ra nameyê xo binuse