Destê Edîtorî ra


Bîyê 52. rojî ke artêşa tirka îşgalkere û çeteyê ci erzîyenê Kurdîstanî ser. Efrîno rengin, veyveka Kurdîstanî, qehremankî xo ver ro dana, la binê blokaj û bombardumanan de kî nalena. Bîlançoyê rojanê verênan gonin o. Bi seyan şehîdê ma estê, hende zaf kî sîvîlî bîyê mexdûrê top û hêrişanê artêşa tirke û çeteyan.

Herçiqas ke kurdî sey qehremanan xo ver o danê, bê destekî îhtîmalê zaferî girs nîyo

Nê saetan de Raco, Cindirês û Şerawa de hîna pêrodayîşî dewam kenê. Top û tankê tirkan nanê dewanê dormeyê Xalta, Cindirês û Bilbilê ra. Tena Bilbilê de 24 saetan de 250 topî varayî. Melumatê YPG ra gore, têkewtişan de 100 ra zêde hêrişkarî ameyî kiştene. Leşkerê YPG û YPJ xo ver ro danê, la bê destekî û bê tedbîranê ver bi hêzanê hewayî yê Tirkîya, kewtişê Efrînî na wo yeno. Û dinya û mutefîqê kurdan bêveng ê.

Kurdî çira tena yê?

Kurdî çira ancîya tena mendê? Ma ke nîyadîme tarîxî de, na îstîsna nîya. Kurdîstan cayêde muhîm û stratejîk o, labelê heta ewro qet rêxistina kurdan a sîyasîye sey hêzo xoser nêameya hesibnayene. Kurdî tim enstrumanê sîyasetê kesê bînî bîyê. Nîya hêzanê dinya besekerd kurdan de kay bikerê û meslehetê xo dima şorê. Ma ke seba DYA û dinyaya azade kewtîme cengê DAÎŞ, qehreman ma bîyîme. La wexto ke endamêde NATO, Tirkîya, hêrişê ma keno, dinya ma xo vîr ra kerdîme. Eynî çî referandumê Kurdîstanî û Kerkûk de qewimîyabî. Kurdê ke lazim nêbenê, êdî destek û piştgirîye ra birîyayê. Cengê DAÎŞ ra dime eslê xo de gerek xelata ma sedaqetê DYA û Ewropa bibîyêne. La nîya nêbî. Şehîd û serkewtişê ma çîp xo vîr ra bîyê.

La gune tena vilê dewlet û dugelanê dinya ser o nîya. Ma kî bêxeta nîyîme. Wexto ke Kerkûkî kewto, ma vatbî “her çî ra ver, gerek ma yewbînan ra hes bikerîme ke bibîme yew. Eke ma destpêk ra yew bibîyêne, Kerkûk ewro hîna zerrîya Kurdîstanî bibîyêne û pêşmergeyî duştê dişmenî de pêro bidayêne”. Eynî çî seba Efrîn vîyartbar o. Yewîya kurdan ke bibîyêne, ma veyveka Kurdîstanî biseveknayêne. Ganî ma veyveyê her kesî de kay mekerîme. Ma rê sereko girs, ha DYA bo ha Rûsya bo, lazim nîyo. Eke ma werteyê xo de bibîyêne yew, îtafaqê ma ke estbîyênê, ma caran bin nêkewtêne. Çike seba dinya Kurdîstan de tena meslehetî estê, înan rê dost û dişmen muhîm nîyo. La seba kurdan Kurdîstan her çî yo. Her kurdo ke zerrîya xo de Kurdîstan esto, ney hîs keno. Coka ganî ma sey welatê xo xoverrodayox bîme. Beno ke Efrîn keweno, la gerek fikrê Kurdîstan û kirmancîye pê mekewo.

Kurdîstan her çî yo

Efrîn zerrîya ma der o, la eke kurdî yew nêbenê û cayanê bînan ra ci nêresenê, îstîqbalê şaristan û herêmî maneno Kobanî. Bêşik, ma yê heta dilopa gonî ya peyêne pêro dîme. Kurdîstan welatê ma yo û ma canêverdanîme ke cinawir û îşgalkeran dest pira nê. Hêvîya ma ya ke xoverrodayîşê Efrînî pêro kurdan, rêxistin û partîyan rê bibo derse: ti ke dewlete nîya, ti ke yew nîya, ti xemê kesî de kî nîya.

Bi nê qisayan ma şehîdanê xo rê aramî, şarê xo rê aştî û Kurdîstan rê azadî wazenîme.

Kurdîstanê Rojawanî hema tam azad nêbîyo
PARE BIKE
DêrsimInfo
DêrsimInfo keyepelê kirmanckî yo ke serra 2010 de kewt fealîyet û xizmetê xo atraktîfkerdiş, raverberdiş, geşkerdiş û vilakerdişê kirmanckî (zazakî) de tarîf keno. Aye ra teber DêrsimInfoyî xo rê hedef kerd ke zaffikirîye û zafrengîya komelê kurdan temsîl bikero.

CEWAB BIDE

Please enter your comment!
Please enter your name here