Merasîmê Festîvalê 14. yê Kultur û Tebîetê Mizurî de duştê awbend, HES, qereqol û qeleqolanê dewlete de nûmayîşê protestoyî ame kerdene. Protestoyî xo govenda di kîlometreyan de musna.
Peynîya Festîvalê Mizurî yê emserî de bi hezaran kesî Meydanê Seyîd Rizayî de amey têlewe ke heta Zîyara Kemerê Belî ke Gelîya Mizurî der a, nûmayîş bivirazê. Tey pankartî sey “No hardê ke ma rê heyat da, deynê ma yê heyatdayîşî kî ci rê esto”, “Dêrsim de awbendan nêwazenîme” û “Dêrsim de qereqolan nêwazenîme” amey eştene.
Çalakîye de xeylê hunermend, roşnvîr û endamê rêxistinê sîvîlî beşdar bîy. Hemserekê beledîya Mehmet Alî Bul û Nurhayat Altun virênîya nûmayîşî de bîy. Verê Zîyara Kemerê Belî de grûba protestokerdoxan minete kerd û soz da ke Çemê Mizurî û zîyaranê Dêrsimî biseveknê. Hemserekê beledîya Bulî do derheq de va ke “Ma soz danîme ke emanetê Sey Riza, Pîr Sultan Abdal û Duzgî Bavayî rê wayîr vejîme.”
Badê, protestokerdoxî yew rêzê govende ke 2 km derg bî, ant. Nîya qaydan ra gore govenda tewr derg ameye kerdene. Badêna, çalakî ancîya Meydanê Seyîd Rizayî de qedîyaye.
