Aşmê ra ver, seba ke bi kirmanckî (zazakî) aktîvîteyan bikerê, bi nameyê “Morceleyanê Kirmanckî” grûbê ronîyabîye Dîyarbekir de. Grûbe 3. teşrîna peyêne de şewêda şîîran amade kerde ke tede şaîranê sey Bedrîye Topaç, Omer Barasi û Denîz Gunduzî şîîrê xo wendî. Xeylê kirmanckîhesan kî na aktîvîte de cayê xo girewtî.

Morceleyanê kirmanckî seba aktîvîteya dîyine kî ju konser organîze kerd. Endamanê Morcelayênê Kirmanckî ra Esat Şanlîyî destpêk, mabên û peynîya konserî de xîtabê mêmanan kerd, beşdarîya xurte ra keyfweşîya xo û qalê muhîmîya çalakîyanê nîyanênan kerd. Dime ra deyîrbazo dêrsimij Celê Bolizî mêmanan rê kilamê kirmanckî vatî. Konserê ey bala zaf kesan ante. 100 ra zafêr mêmanî ameyî têlewe û pêro pîya kilamê kirmanckî vatî. Endamanê Grûba Vateyî ra M. Malmîsanij, Mehmûd Neşite û Heyder Diljen kî mîyanê goşdaran de bîyî. Çîyêko zaf weş kî beşdarîya tayê kirdasan (kurmancan) bîye. Nê kesan kî kirmancan (zazayan) de pîya kilamê kirmanckî vatî.

Morceleyê Kirmanckî do seba kirmanckî (zazakî) aktîvîteyanê xo dewam bikerê. Grûbe wazena bi nê aktîvîteyan prestîjê kirmanckî (zazakî) bizêdîno û kirmanckîhesan bîyaro têlewe. Endamê grûbe vanê “Na grûbe bi temamî însîyatîfêde sîvîl û dildarane yo. Grûbe girêdayeyê qet ju sazgeh, dezgeh, partî ûsn. nîya. Çîyo ke endaman ano têhet, tena kirmanckî (zazakî) ya.”

Konser ra çend dîmenî:

PARE BIKE
DêrsimInfo
DêrsimInfo keyepelê kirmanckî yo ke serra 2010 de kewt fealîyet û xizmetê xo atraktîfkerdiş, raverberdiş, geşkerdiş û vilakerdişê kirmanckî (zazakî) de tarîf keno. Aye ra teber DêrsimInfoyî xo rê hedef kerd ke zaffikirîye û zafrengîya komelê kurdan temsîl bikero.

1 ŞÎROVE

Comments are closed.