‘’Dîlîmîzê û kulturumîze sahîp çixmiş bîme!”

Her serre ju roje, “roja zonanê dinya” de, û ge-ge zî ke hertim ( tenya bi tirkî) nusenê, qisey kenê. Ez ke nînan vînena, wanena, huyînna. Hem huyîna, hem zî qehirîna, hêrs bena. Serran bi serran ê ke derheqê zonê ma de ju şanike tekrar kenê:

” Dîlîmzê û kulturumîze sahîp çixmiş bîme!” (Zon û kulturê xo rê wayîr vejîme)

Ê bi xo zî “dîlîmîz” nêzanê, nêmusenê!

Zurî kenê! Xo xapnenê! Tenya bi tirkî nusenê, sloganan û zuran ercenê.

Vanê! Henî rehet vanê ke! Xo ra vanê, tenya vanê. Qey tenya vanê? Qey bi xo “sahîp çixmiş” nêbenê?

Ê wendox ê, zana yê, roşnvîr ê! Karê înan tenya vatiş o. Ma ra vanê, ma cahîlan ra! Vanê. Raye musnenê ma qaşo! Ê memurê zanayîşê ma yê! Memurî vanê, ma kenîme. Memurî nêkenê, ê tenya vanê!

Memurê ma, biaqilê ma, roşnvîrê ma! Henî zaf ê ke! Xwezila ma! Ma endî çi wazenîme ke?

Ez seba nê memuran û zaneyê ke bi aqilê ma û şarê ma kay kenê, tenya naye vana: “Lawo, raya xo de şorê! Îhtîyacê ma bi na leqa şima û nê aqilê şima çin a!”

Tenya vanê “rojbaş”, peynîye nêanê. Tenya vanê “ma bixeyr”, peynîye nêanê. Yanî, peynîye ebe tirkî ya. Eke vanê “rojbaş û ma bixeyr”, dime ra “nasılsın, ekomomîk, modernîte, halqların qardeşlixî, AKP gericilixî, Fetullah û emperyalîzm û sosyolojik û bîyolojik û surec û, barış û sabote û hasas û masas.”

Lawo, lawo, lawo! Şima çiqas çi zanenê, pepoooo!

Errrrrik!

Wendoxê delalî! Hevalê hêcayî!

Kamî ke şima ra nîya vanê û bi xo zî zonê ma nêzanenê û nêmusenê, pêşnîyazê mi no yo ke înan ra tenya naye vajê:

“Errrrik! To rê helal bo!”

Çike no ju kompleks o. Serran bi serran memurê dewleta tirkan, seba ke şarê ma zonê tirkî nêzanitêne, ya zî şenik zanitêne, ebe şarê ma leqe kerdêne, qijkek dîyêne. Yeno şima vîrî. O dem û dewranê înan qedîya. La nika nê “zaneyê ma” ma rê leqanê newîyan kenê, çi heyf!

“Dilimize, kulturumuze sahip çikalım” (zon û kulturê xo rê wayîr vejîme) vanê. Ê bi xo zî ne “dilimizi” zanenê ne zî wazenê bimusê.

Ez zî înan ra naye vana: “Ma ‘sahîp çixmiş bê! Kamî destê şima girewt? Kam nêverdano ke şima ‘sahîb çixmiş” nêbê?”

Şima ke zonê xo nêmusenê, qet ke mebo na leqe mekerê. Şima ke na leqe bikerê, ma zî şima rê leqe kenîme.

Errrrrik! Şima rê helal bo!

Şima na rastîye ra henî dûrî yê ke nuşteyê mi vînenê, qaşo wanenê, la seke kabos dano şima ra, henî nêwazenê bivînê, nêanê xo ser o. Faydeyê rastîye ra remayene çin a. Rastîya zonê ma şima rê zê kabos a. Ya zonê xo bimusê, ya zî na leqe mekerê. Şima ke nê kompleksî xo ser o meercê, no kompleks şima qedêneno.

Mekerê, heyf o!

Ez qalê şanik û çîrokan nêkena. Ez qalê sebebê bîyene û çinbîyena ju şarî kena. No hobî û lobî nîyo. No karê leqe nîyo. Zonê asîmîlasyonî ebe xo meçarnê. Însananê ma asîmîle mekerê.

Ebe “Sen haklisn, doxrî soyluyorsun” (Heqa to esta, ti rast vana) nêbeno. Wa xwezila ez “hakli” mebîyêne. Şima mordemî “haklı” bîyene ra kenê bêzar.

Şima zonê xo bimusê, wa ez neheq bî, muhîm nîyo.
Şima zonê xo bimusê, çi vanê vajê, muhîm nîyo.
Şima ke zonê xo memuse, çi vanê vaje, no qet muhîm nîyo.
Şima fam kenê mi? Ê yê fam kenê, famnêkerdeyan ra qal bikerê

Ez qefelîya!

Leqan ra qefelîya, zuran ra qefelîya, amîr û memuran ra qefelîya.

Kompleksê şima canê ma werd!

Derd û muşgulatê şima ne zon o ne kamîye ya ne zî kultur o. No ke bibîyêne, şima serran bi serran na leqe nêkerdêne. Hîna zî na leqe kenê. Zaf dewan û şehranê Kurdîstanî de qet tirk çin o, la zonê tirkî şima bi xo benê. Şima înkar bikerê-mekerê, bi no hal şima asîmîlasyonkar ê. Şima bi vilakerdena zonê asîmîlasyonî, biwazê-mewazê, binê xizmetê kulturê asîmîlasyonî der ê. Ma Ewropa de zî bekçî û qanûnê tirkan esto? Ewropa de zî mektebê tirkan ê ke şima mecbur bê, estê?

Ney! Ma qey zonê xo nêmusenê şima? Kam nêverdano? Asteng çik o?

Lawo, raya xo de şorê!
Ebe ma, ebe şarê ma leqe û tinazan mekerê! Xo rê şorê “ekolojik û bîyolojîk û sosyolojîk û konfederolojîk û yaşasın û maşasın” kay bikerê! Ge-ge zî tenya “bijî” cikerê. No zî seke heq û şeytanî juminî ra çiman qirpnenê, henî yo.

De bi desturê şima ez vajî ke ma endî bîme pîl. Doma nîme! Emrê ma sîyaset û fîlmê sîyasyetan ra vîyart. Şima sîyaset ra domanê vizêrî yê.

Şima ewro zaf kesan beno ke xapnenê. Ma meşte?

Luzimê titik û vitikan çin o!

No welat, no zon, na kamîye ebe rastîya xo şima heta Anqara fetelnenê. O ca de endî şima “dilimize sahip çixmiş kenê, kimliğimize Tayip çaxmiş kenê, surec û murecan kenê, halkların qardeşlixî kenê, Tirkîyalileşmek kay kenê”, se kenê bikerê.

Îlhamî Sertkaya