DêrsimInfo kam o?

Gerek kirmanckî her cayê heyatî de vila bo.

DêrsimInfo keyepelê kirmanckî yo ke serra 2010 de kewt fealîyet û xizmetê xo atraktîfkerdiş, raverberdiş, geşkerdiş û vilakerdişê kirmanckî (zazakî) de tarîf keno. Aye ra teber DêrsimInfoyî xo rê hedef kerd ke zaffikirîye û zafrengîya komelê kurdan temsîl bikero.

DêrsimInfo sîteyêda xoser a, bi qet partî, dîn ya îdeolojî ra îrtîbatê xo çin o. No keyepel keda çend kesanê welatperweran a ke xizmetê ziwanê xo kenê. Her çî çarçewaya demokratîka lîberale de virazîno, polîtîkaya DêrsimInfoyî bi giranî ziwan û kultur ser o yo. Herçiqas ke tede kî muhtewaya sîyasîye yena dîyene, keyepel bi xo terefgirê vînayîşêde sîyasî nîyo. Îdarekerê DêrsimInfoyî xo kurd zanenê û kirmanckî (zazakî) sey parçeyê kurdkî, kirmancî (zazayî) kî sey aîdê şarê kurdî hesibnenê.

Polîtîkaya ziwanî de DêrsimInfo meylê standardê Grûba Xebata ya Vateyî ke 1996 ra bi nat kirmanckî ser o gureyena û naye de qaydeyê gramerî û rastnuştişê ziwanî tespît kena, esas gêno.

Bawerîya serek a nê keyepelî a ya ke kirmanckî her cayê heyatî de vila bo. No rayber ra gore viraştox û nuştoxê DêrsimInfoyî hemfikr ê ke însan besekeno weşîya xo biserûber û seranser ziwanê xo yê dayîke de biramo. Seba naye DêrsimInfo xizmetê xo pêşkêşê wendoxanê xo keno û her kes silayî keno ke dest bido nê tesewurî ke mileto kirmanc destadest duştê asîmîlasyonê ziwanê xo de bimano. Kirmanckî xo vîr ra nêbo.


 

Têkilî (Kontak): info@dersiminfo.com