Mana û muhîmîya 8. Adare ser o

Sere de 8. adare, Roja Cinîyanê Cîhanî fîraz û bimbarek kena û şehîdanê 8. adare û bitaybetî kî şehîdanê Parîsî Sakîne Cansiz, Fîdan Dogan, Leyla Şaylemeze bi rûmet yad kena.

Waxto ke Parîs de hîrê sîyasetmedarê kurdî Sakîne Cansiz, Fîdan Dogan û Leyla Şaylemeze hetê xayîn û bêbextan ra amey kiştene, mi kî hîsê xo yê a roje na şîîra xo de ardî ra zon û nuştî. Ez kî mana û muhîmîya na roje ser o na şîîra xo yadê Roja Cinîyanê Kedkaranê Cîhanî, yadê kedkaranê zê Sakîne Cansiz û kedkaranê ke bi can û bi royê xo seba raxelesîyena welatê xo, seba aştîye de birûmete mucadele kenê û bi çar destan pilesîyê ro ala azadîye ra, yadê înan kena.

Dêrsimija porsûre

No çi hal o Parîs, no çi hal o?
Mij û duman to ser o darîno we
Qerqeşûnî ma ser ro varenê
Pepûk reyna ma rê bêkes bêkes waneno
Na weqeta çandin a Parîs, yê çandin a?
Meke Parîs meke
Na juye rê ma meke
Dişmen rê ma şad meke
To dî, dişmenî reyna destê xo hene kerdî
Keyf û eşq de rê pêro
Ma şîn û şîwan der îme
Ax û waxe der îme
Ti vanê solê şana re kûl û bîrînan
henî ke jan danê
henî ke ziqitnenê

Qey nîya kerhest a, Parîs?
Vace Parîs vace
To kî çîyê vace
Henî bêveng mevinde
Vace hela ma ra vace
To serê hardanê xo ra,
ey bêbextî, ey celadî, ey mixenetî…
se hewe nay, se?
To se qemîşê hîrê cana,
hîrê sîyasetkara,
hîrê şoreşgera,
hîrê qehremana,
hîrê xezala,
hîrê aktîvîstanê kurda,
hîrê gulanê azadîye bîya?
Ma to se qemîşê dêrsimija porsûre
û porxelekine bîya, se?

Vace Parîs vace
Henî bêveng mevinde
Qatîyê rîye ma be
û vace ma ra vace
Na çi weqete bîye,
to arde re ma ser?
Destê ma pîsîrê to de,
destê to kî pîsîrê mixenetî de bo
Wa axa şehîdan hard de nêmano
Qatîyê rîyê asmênî be
çimanê to ver de
Rîyê asmênî ra hîrê astareyê bînî şeqetîya ro
henî bêveng û henî bêkes
Hîrê teyranê azadîye fir da asmênê Parîsî ra
Henî bêveng û henî bêvac
Hîrê gulanê azadîye verê xo çarna re welat
Juyê verê xo çarna re Dêrsim
Juyê çarna re Mêrsîn
Juyê çarna re Maraş

Vace Parîs vace
Henî bêveng mevinde
To gurete ma ra
Dêrsimija porsûr û porxelekine
porkeje û porbelaye
Qey Parîs qey?
To gurete ma ra
kêra ma şervana ma
to gurete ma ra
porsûr û porkewa ma
to gurete ma ra
porhene û porxelekina ma
to gurete ma ra
Sakîna Cansiza ma

Vace Parîs vace
Henî bêveng mevinde
kanê Dêrsimija porsûre û
porxelekina ma, kanê?
Kanê torna Seyîd Rizayî ya kêre, kanê?
Henî kerhest mevinde
Ya, to kî şîrîgê nê bêbext û bêwîjdanan a?

Ravaze Dêrsim ravaze
Ravaze Amed ravaze
Ravaze Maraş ravaze
Ravaze Mêrsîn ravaze
sare berz kerê
Parîs ra hîrê meymanê şima estê
hîrê sîyasetkarî,
hîrê şoreşgerî,
hîrê qehremanî,
hîrê xezalî,
hîrê aktîvîstê kurdî,
hîrê gulê azadîye
Sakîne Cansiz, Fîdan Dogan û Leyla Şaylemeze
şima rê meyman ê

To zana Dêrsim
na rey meymana to kam a?
Torna Seyîd Rizayî
Dêrsimija porsûre û porxelekine
şervana to,
xezala koyanê to
yanî çêna to Sakîne Cansize
hem kî bi ax û waxa hardanê to
hem kî bi ax û waxa Çemê Munzirî
to rê meyman a Dêrsim,
to rê meyman a.

2 ŞÎROVEYÎ

  1. Vengê sima ju roze ju gamê ju waxt ju xafilede reseno Porsure….
    Nusneyê sima ju roze beno nonê ancilîyê royê Porsure
    Vijer ra amey me, some meste û biyero, ewre xo virra kere
    Gonîya çend hazaro ke no wertalixte nîya yeno rosene
    Wertalixê serd de yeno rosene…
    Yeno rosene…
    Ewre xo virra kerre endî, endi waxtê ronayisê mesteyo, ewre endî hereyo…
    Ewre ame rotene, ewre xo virra kerre…
    Meste ronê xortê Kurdî, meste rone, meste rone…

  2. Dêrsimija Porsûre ma re venga, ma re renga, ma re roştîya û ma re rumeta. A yê seba azadîya miletê xo, seba welatê xo canê xo feda kerd. Hîris serre verba zulmê zulmkarî de mucadele kerde. Bi serran zîndanan de mîyanê çar dêsanê serdinan de mende. Seba raxelesîyena welatê xo, seba aştîye de birumete dişmenê xo de ceng kerd.
    Seba ke mordem Dêrsimija Porsûre bîyaro ra ziwan û binusno , gere ke Dêrsimija Porsûre kî rind nas bikero. Heyat û têkoşîna Dêrsimija Porsure gere ripelanê tarixê ma de cayê xo bicero. Nayê kî gere hevalê Porsûre bi xo bifikirîye û binusnê. Ma re kî têkoşîna /mucadela Dêrsimija Porsûre re û namê a yê re wayîr vecîyene manena.
    To weş û war bê Mêymanê Usarî. Şîroveyê to seba ma muhume.

CEWAB BIDE

Keremê xo ra şîroveyê xo binuse
Keremê xo ra nameyê xo binuse