Keyepel Nuştoxî ra Mehmud Nêşite Dersa Weçînita Ser o

Dersa Weçînita Ser o

598
2

15. – 16. na aşme de mekteban de wendekarê ke sinifa 4, 5, 6 û 7 de wanenê, ganî hetanî 20. na aşme muracatê dersa weçînita bikê. Mîyanê dersanê weçînitan de dersa kurdkî zî esta. Wendekarêk eke bi yew waştişname muracatê mudirê/a mektebî biko, dewlete mecbur a ke înan rê mamosta bivîno û o mekteb de na derse bido wendiş.

Mîyanê nê dersanê weçînitan de dersê kurmanckî û yê kirmanckî/zazakî zî estê. Yanî eke yew wendekar bi yew waştişname muracatê mudirê/a mektebî biko, dewlete mecbur a ke mamostayanê dersa kirmanckî û kurmanckî peyda biko. Eke dewlete luyekî nêko û rasta zî mamostayan dima bigêro şertanê ewroyinî de mamostayî zaf ê û eşkena mamostayan bivîno. La ganî yew mekteb de hûmara wendekaranê na derse des ra cor bê.

Bi ziwanê dayîke perwerde hem heqê însanîyetî yo hem heqêko demokratîk o hem zî seba kurdan no heq, heqêko mîlî yo.

Ez şaş nêbî, par û pêrar zî mîyanê dersanê weçîniteyan de reyna dersa kurmanckî û kirmanckî bibî. La nê warî de kurdî sist têgêrîyabî û muracat nêkerdîbî. Yan zî hûmara muracatkaran zaf tay bî. Nê warî de zî kurdî zaf rexne bibî.

Nika kurdî bi ziwanê dayîke heqê perwerdeyî wazenê. No waştene hem heqê însanîyetî yo hem heqêko demokratîk o hem zî seba kurdan no heq, heqêko mîlî yo.

Ez wîna bawer a ke heme çî ra ver heqê zîwanî û bi ziwanê xo perwerde bîyayîş heqê serekeyî yo. Çunke seba kurdanê Tirkîya waştişo tewr muhîm heqê ziwanî yo. Mîyanê waştişê heqê ziwanî de zî her çî ra ver waştişê bi ziwanê dayîke perwerde esto. Eke no heq bi heme rengê xo bêro dayîş, xo reyde heqê bînan zî ano.

Ewro eke mektebê kurdan bibîyêne, ez wîna bawer kena ke heqê înan ê sîyasî û yê mîlî do hîna zaf biameyêne dayîş. Yan zî eke ewro mekteban de bi ziwanê dayîke perwerde biameyêne kerdiş, o wext kurdî do biresayêne zaf heqanê xo yê bînan.

Labelê mi cor de zî va, nê warî de kurdî zaf sist ê. Derheqê ziwan û perwerdeyî de sey waştişanê xo yê bînan zor nêdanê nê waştişî.

Emser zî sey par û pêrarî sazî û partîyê kurdan nê warî de wazîfeyê xo nêanê ca. Ganî nê rojan sazî û partîyê kurdan nê warî de, warê na dersa weçînita de şarî heşar bikerdêne û bikewtêne vernîya şarî û şarî rê rehberî bikerdêne. Ganî heme medyaya kurdan de propaganda biameyêne kerdiş.

La ez bi xo hema rastê nê çîyan nêameya. Ez zî bawer kena ke na dersa weçînita seba kurdan çare nîyo. Hetanî ke dersa weçînita yew xap o! Bi kurdan yarîkerdiş o! Ez bawer nêkena ke dinya de yew mîlet bi no şekil bi ziwanê xo perwerde bibo. Bi no qayde ziwanê xo bimuso.

Labelê goreyê şert û şurtê Tirkîya û konjokturê kurdan ganî kurdî sey heme îmkanan nê îmkanî ra zî îstîfade bikê. Mi gore hûmara nê waştoxan çend zafî bê, seba hedefê bi ziwanê dayîke perwerdeyî rê hende beno destek.

Eke hûmara muracatkaran tay bo, dilq ho ma hemine mil de. Labelê dilqo pîl milê partî û sîyasetmedaranê ma  de yo.

Çend rojê bînî hûmara nê waştoxan do dîyar bibo. Ma do netîceyê nê statîstîkî bivînî. Tersê mi o yo ke sey par û pêrarî hûmara waştoxan reyna tay bo. Eke hûmare tay bo, dilq ho ma hemine mil de. Labelê dilqo pîl milê sazîyanê ma yê ke nê warî de xebetîyenê, de yo. Dilqo pîl partî û sîyasetmedaranê ma mil de yo.

Hetanî ewro ganî sere de partî, sazî û sîyasetmedarê ma nê warî de seba ke şar nê dersî biwazo xesasîyetê xo bimotêne û propaganda bikerdêne. Ganî beledîyayê ma bi no qayde tewbigêrêne û beşdarê nê propagandan bibîyêne.

Rasta, par zî na mesela tay kesan ardibî rojeve û tay kesî munaqeşe kerdibî. Nê munaqeşeyan de tay îdarekarê mekteban zî ameyêne rexnekerdiş. Tay mekteban de îdarekeran nêwaştîbî wendekarî nê dersan weçînê. Beno ke emser zî rewşêka wînasî bibo. Labelê mi gore no çî mazeretêko bêqîymet o. Eke şarê ma na mesela zerrî ra biwazo, tu kes nêeşkeno vera waştişê şarî de vindero.

PARE BIKE
Mehmud Nêşite
Mehmud Nêşite 1945 de dewa Xosorî, qezaya Licê, bajarê Dîyarbekirî de ameyo dinya. 1963 de bîyo mamoste. 30 serrî tayê bajaranê Tirkîya û Kurdîstanî de mamostayîye kerde. 1994 de teqawut bîyo. Nêşite 1980 de surgun bîyo, nika Dîyarbekir de ciwîyeno. Bi kirmanckî hîkaye û meqaleyan nuseno û endamê Grûba Xebate ya Vateyî yo.

2 ŞÎROVEYÎ

  1. Ma bixêyr kek Mehmud;
    Bakur, bi nameyê sîyasetî, her çî, bêveng, kerd Tirk û Tirkî. Zonê sîyasetî Tirkî yo, medyayî, Tirkî yê, ‘sempatîzanî’ Tirkî wanenê, qisey kenê. Coka ke mi va û vana ‘endî naye ra tepya, kesî ra lom û rexne mekime, ma bi xo, ‘şarê xo kenîme asîmîle’! No halo xirab verê çimanê ma pêrune de dewam keno. De bê ke nê halê xirabî ra raxekesîye!Barê ma zaf giran o, kek Mehmud! Bi hurmet û silamî

  2. dersa wecinitisi 25 milyon kesi re ju heqerete girso. Se tere Bask gerekeke raver perwerdeye kurdkiye mecburi biyero virastene u gerkeke her karkero ke Kurdistan de vazeno ke biguriyo, kurdki bizeno. O waxt sima vinene ke merdim cutir ziwane xo miseno.

CEWAB BIDE

Please enter your comment!
Please enter your name here