Meyîtanê ma rê kî êdî rehetîye çîn a.

Seke şima kî zanenê, maya Aysel Tugluke roja çarşemîye, 13.09.2017, edi Anqara de şîbîye heqîya xo û cenezaya rehmetîye kî edi goristanê Golbaşi Încekî de daybîye we. Wedardena ceneza ra dime yew grûba faşîste hêrişê mezela Daka Xatune kerdbî û meyîtê ma mezele ra vetbî…

Raştî kî can damîşê nê zulmî nêbeno. No zulm name nêbeno ke mordem name kero. De bê memire, de bê damîşê nê zulmî be, se damîş bena?

No hesab, rew-herey, gere nê bêbextan ra bêrone perskerdene. Her kes vengê xo berz kero û vejîyo kuçeyan, vejîyo meydanan û bi vengêde berz nê xayînan protesto bikerone. Bêveng vinetene merdena ma wa, merdena miletê mazlumî ya. Êdî waxtê bêveng vinetene nîyo. Ewro ke meyîtanê ma rê kî rehetîye çîn a, bizanê ke êdî hal yeman o.

Cayê mezela Daka Xatune goristanê Anqara nêbî. Cayê mezela Daka Xatune hardo dewrêş Dêrsim o. Ma rê çi lazim o, goristanê Anqara? Cenezayanê xo berîme welatê xo, berîme hardanê xo, berîme welatê baw û kalê xo… meyîtanê xo welatêde xerîb de wemedarîme, wemedarîme ke asteyê meyîtanê ma kî wa meziqitnê.

Helbet her metre, her game û her bosta hardê dewrêşî rê vatena ma çîn a, la çi heyf ke hardê dewrêşî ser o tayê mewran û zindîqi cêrenê. Nê hardan ser o kî gere nê zindiqan re ca çîne bo. Na mezele nînan rê cehenem kerê!

Reyna rind ame zanitene ke êdî kîndar û dîndarê Recebî meyîtane ma rê kî tahamul nêkenê. Wulle Heqî miradê Recebî kerd û kîndar û dîndarê Recebî êdî bîyê pîl û pey ra reştê ci. Nê kîndar û dîndarî êdî vatene û emrê Recebî der ê.

Hevalno, ma ke nê bîyayîşan rê bêveng vinderîme, ma hona zaf nexşê nîyanênî yenê ma û miletê ma ser. Na saete ra tepîya her kes no xusûs de vengê xo berz kero û verba nê hêrişî de bêveng mevindo. Ewro nê bêşeref û bêwîjdanan hêrişê bawerîya ma, hêrişê meyîtê ma, hêrişê însanetîya ma kerdo.

Ma na bêbextîye qebul nêkenîme. Destêde ma pisirê dewleta tirke der o. Hukmatê AKP gere her û kutikanê xo rê wayîr vecîyo. Nê her û kutikanê xo rê ke wayîr nêvecîno, bare xape bierze vilê cayê ra girêde.

Daka Xatune, ez zana cayê mezela to goristanê Anqara nêbî. La to êdî hardo dewrêş Dêrsim der a. Ti rehet rakuye û qesaweta to çîne bo. Rew-herey, rojê ney rojê heqa şima mazluman pêrune nê kîndar û dîndaranê Recebî ra yena perskerdene.

Ez kî Daka Xatune bi hurmet yad kena, wa cayê xo werteyê gul û nurî de bo! Nê kîndar û dîndaranê faşîstan kî şermezar kena û nê bêşeref û bêwîjdanan rê hezar reyî nalet wanena, tu kena bi werteyê rîyê nê kîndar û dîndaranê faşîstan…

4 ŞÎROVEYÎ

  1. Keko,
    Eleqeyê na faşîstan û dîndarî ça ra peyda bena?! To ça ra xo resna dîndarî? Qet yew dîn zî qarîşê meyîtan nêbeno. Mi gore eleqeyê înan û dîn çin o. Her çend tekbîr bilawî zî eleqeyê înan û dîndarî çin a. Bimane weşî de.

  2. Harde bimbareke welati de sare ma re ca esto. Dayike rever resa heqiya xo, nika ki harde xo. Be hard, be ziwan u be welat nebeno, ewre ma na rastiya ancina vinitime. Aysel Tugluki raya xirabina Türkiyelilesme, Anqare filan ra endi bi pero Kurdan biviso, be welat, be hard, be dewlete yani be Kurdistan heyat u merdene mare ziqimo.

  3. Kek Ali Veli
    Beno ke dîndarîya to şey nînan nébo. Labelé ne xo bixapîne ne zî ma bixapîne. Heme dîn û dindarî kem zaf kîndarî. Né kîndaré recebî zî kindariya xo asiman ra ney seré herd û tarîxé dîné xo ra génî. Eke wina nebînî Çiko winasî miyané mislimanan de mumkun nébî û nébini zî.Eke eleqayé né guré û mislimanan çiné bibinî hewce bi ke veré heme kesan mislimanan îtîraz bikérdini.

CEWAB BIDE

Keremê xo ra şîroveyê xo binuse
Keremê xo ra nameyê xo binuse