Ez vana ke heta ke dewleta ma çin bo, qetlîamê Pirsûsî nêqedînê. Bêdewletîye bi xo qetlîam o. Binê bandura dewleta tirke de aştîye, silametîye, demokrasîyê ma rê nêna. Xora dewleta tirke serê qetliamê ma ra virazîya. Înkar û qetlîamê ma ke mebo, dewleta tirke zî nêbena. Kes binê manga de golikî ra megêro. Sîyaseto ke bêdewletîya ma wazeno, qetlîamê ma zî (nîyetê xo çi beno bibo) wazeno. Mi ra, ma ra binê bandura dewleta tirke de qalê aştîye û demokrasîye (!) mekerê! Heta ke ma binê bandura dewleta tirke de bîyîme, ê qetl kenê, ma zî şermezar kenîme. Şermezar kerdene rind o, la çare nîyo. Hesabê sîyasetî zaf o. Kam ke ma qelt bikero, planê xo yê ver û dima qetlîamî de zî virazenê. Medyayê xo, vateyê xo amade kenê. Manîpulasyonanê xo amade kenê.

Ê qetl kenê, ma zî şermezar kenîme

Ez vana ke qetlîamê Pirsûsî dewleta tirke kerdo, erceno DAÎŞ ser o. Ya zî ebe DAÎŞ do viraştene. Axir çi beno bibo, adresa qetlîamî dewleta tirk a. Seba naye luzumê çuwalê analîzan çin o.

Ez vana ke kurdî gereke biaqil bê (Mi xelet fam mekerê, mevajê kurdî bêaqil ê, ti qey nîya vana). Ney bira ney, kurdî sîyaset de zaf zî biaqil nîyê. Eke biaqil bîyêne, Rojawan û Başûr roja verî bê veng û qal û qir ameyêne têlewe. Rojawan de cayê ke raxelesîyê, PYD kerdo piro vano kanton. Amerika ra mebîyêne, Kobanî qedîyêne. Rojawan ke piştîya xo tayê berz keno, ancîna mesajanê negatîfan dano Kurdîstanê Başûrî. Seba piştîdayena pêşmergeyan ra zêde çend sosyalîst û çepê tirkan ra minete keno. Ez vana ke no plan o, planêde ver bi xoserîya dewletbîyena Kurdîstanî yo. Nê sosyalîstanê marîjînalan de ke xeyr bibo, Tirkîya de çîyê kerdêne! Nê komê marîjînalî vanê, ma Rojawan pîya sevekna, pîya virazenîme. Gelo rast o? Kamî Rowavan barbaranê DAÎŞ ra raxelesna? Zelal o ke qewetê koalîsyonî raxelesna.

Nê sosyalîstanê marîjînalan de ke xeyr bibo, Tirkîya de çîyê kerdêne!

Ez vana ke “halklarin qardeşlixî rind o”, la no çare nîyo. Sîyaset de kes “qardêş”ê kesî nîyo bira! Sîyaset menfat o, keko!

Ez vana ke domananê şarê ma seba planê entegrasyonî mexapnê! Seba entegrasyonî, luzumê herbî çin o!

Ez vana ke Kurdîstanê Başûrî ewro sey dewlet a. Cika dinya nas kena. Şima ke dewlete mebê, pancas mîlyon bê zî, fayde nêkeno. Qetlîamê Pirsûsî ne ê verên o ne zî peyên.

Ma çare?

Çare dewletbîyena ma ya.

Ez vana ke dewlet bîyene ebe teorîyê “ekolojîk û bîyolojîkan” nêbeno! Ma ra “ekolojîk û bîyolojîk” ney, dewlet bîyene lazim a. Ma şima nêzanenê, Sezaî û Aysel ê DTP, se vat? Ma şima nêzanenê, kamî ge-ge bi nameyê kurdan (!) se vat û vanê? Gelo raşt şima nêzanenê?

Çare dewletbîyena ma ya.

Ez vana ke na dinya de yew hedefê ma esto, yew çareyê ma esto, o zî wayîrê qederê xo, wayîrê îdare û îradeyê xo, wayîrê dewleta xo bîyen a. Eger ke bê naye çareyêde bîn seba raxelesîyayîşê ma esto, kamî zanenê wa vajê. Vajê, la ma mexapnê! Ma zaf xapîyayîme.

Qetlîamê Pirsûsî xora serê nê xapênayîşê ma ra virazîna û virazîya. Heya, şermezar bikîme, lanetî ro barbaran, qetlîamkaran, gonîweran bîyarîme, la tenya naye kerdene çare nîya. Welatê ma na dinya de mintiqayê ke barbarî çar hawîr estê, der o. Barbaran de ne dîn ne îman esto. Barbarî demokrasîye, aştîye-maştîye nêzanenê, fam nêkenê. Barbarî tenya qewet ra fam kenê.

Coka gereke ma bibîme wayîrê qewetî. Gereke ma bi xo xo biseveknîme. Gereke ordîya ma bibo. Gelo ez ordî, herb û pirodayîş ra zaf hes kena? Ney! La ez rastîye ra hes kena. Rastîya ma na wa.

Ya ma zî besekenîme xo seveknenîme, seba naye qewet û ordîyê ma beno, ya zî ma binê qewetê barbaran de benîme pan û puç! 

Pirsûs, sêneyê to de 32 kesî şehîd bîyî. Hîris û di xortî, hîris û di gulî. Pirsûs, heta ke ti bibê “Suruç”, ma dawakar îme. Pirsûs, naye rind bizane ke, herey bibo zî, çila azadîye, çila xoserîye sêneyê to de beno berz. Pirsûs, no slogan, no ajîte nîyo. Gonîya nê şarî zî awe nîya.

3 ŞÎROVEYÎ

  1. xalo ma se kerme kutik onca bîye har perre sare ma ser! Devrimciye ma cişte domone ma cişte xalo!!. hya bra hya devleta ma bîne na derde ma nebîne!

  2. Analîzê sima xof rasto. Siyaseta Tirkîyayist sare Kurdan re se bombeyî pekeno. Pkk ke pêt bivindene, tirkî Rojawada niya hazaran Kurdan qirr nekerdene. Na stratejî hete dewleta Tirkî ame plan kerdene, bi zor Imralî de qebul kerdene. Eke dewleta dost Amerîka nebîyene nika sey hazaran Kurdan qirr biyene. Çepgirê tirkan ra durrî vindere, feyde înan ke bîyene sarê xore biyene. Înanra 30 tenet bi gonya Kurdan bî wekil, înan de ke seref bîyene ney nikerdene. Peynîya hevakenê bi dismen rind nîyo sîyaseta “kurdan”, endî beso…

  3. dereza ti raşt vana,dewleta ma ke bîyêne xortê ma nêmerdêne. qomê Xizirî bêdewlete mendo bextê ma şa wo :(((

CEWAB BIDE

Keremê xo ra şîroveyê xo binuse
Keremê xo ra nameyê xo binuse