Kes nêzaneno
Ez vayê kamcîn koyan ra visîyaya
Û ameya ginaya nê şaristanê qilêrin û gunekarî ra
Ameya ginaya nê bîrê kor û xorînî ra…

Kes nêzaneno
Sêneyê mi de dejê kamcîn zerrîye halên viraşto
Û mi rê sey pepûk û goyînî
Bêvinetiş şewe û roj senî wendo.

Kes nêzaneno
Kuçeyanê nê şaristanî yê tarîyan de
Mi sey maran hezar rey pirên eşto
Hezar rey mi xo kişto û newe ra viraşto.

Kes nêzaneno
Pistanê mi de çiqas duayê pîrozî estbîyî
Mi yew bi yew hemeyî rişnayî
Rîyê nê kuçayanê gunekaran ser.

Şaristano gird û serdin
Şaristano qilêrin û gunekar…

Nê şaristanê qilêrinî û sixletîya hare de
Merdimî bêvinetiş yenê û şonê
Û bi çimanê vengan mi de nîyadanê
Ne ziwanê min ê yabanî ra çîyêk fam kenê
Ne kî tenayîya ke mi de bena têra û mi xo de tehnena ra…   

Kes nêzaneno
Ez çenda yo çend wext o koyanê xo ra dûrî
Yew bîro kor û xorîn de kerr û lal a.

Kes nêzaneno
Ez her şewe kuçeyanê nê şaristanî de
Nimitkî dirbetanê xo yê xorînan ra boya koyanê xo lesena
Û rihê xo, bi qehr û qotik, bi jehr û jan, bi hesrete
Newe ra, newe ra derzena…

CEWAB BIDE

Keremê xo ra şîroveyê xo binuse
Keremê xo ra nameyê xo binuse