Nêzana, na vatena mi rê şima nêvanê çi, gelê embazan, gelê way û birayan?

Di serrî yo ke birêz Demîrtaş hepisxaneyê kamaxê Edîrne yê tîpê F de rehîn o. Roja ke birêz Demîrtaş hetê dewleta Tirkîya ra rehîn ame guretene, yanî 4. teşrîna peyên a 2016î ra heyanî roja ewroyî, gelo ma seba azadîya Birêz Demîrtaşî se kerd? Ya kî ma seba raxelesîyena birêz Demîrtaşî se kerd?

Demîrtaş omidê bêkesan o

Nê persî gerek her kurd, her demokrat, her roşnvîr, her şoreşger, her welatperwer xo ra perso. Qey nîya bêveng û bêvac îme? Naye gere her kes rind bizano ke ma reyna mordemêde zê birêz Demîrtaşî nêvînenîme. Ey seba ma sîyaset kerd, seba mewkî, seba ca û maqamî cara sîyaset nêkerd. Birêz Demîrtaş mordemê roja teng o û omidê bêkesan o. O hertim leweyê mazluman, leweyê bêkesan, leweyê feqîr û fuqareyan de bî. Ewro ey seba miletê xo canê xo feda kerdo.

E ma, ma seba na fedekarîya ey se kerd?

Qet çîyê nêkerd. Ma ne Ewropa de, ne welat de, ne kî cayanê bînan de seba Demîrtaşî tewr di-hîre çekuyî nîyarî ra zon. Ma gelo ma bi no qeyde dawaya xo rê, qomê xo rê, welatê xo rê, wekîlanê xo rê, serekê xo rê wayîr vejîme? Qatîyê ci bê, ma qet rojê seba azadîya birêz Demîrtaşî vengê xo berz nêkerdo. No xusûs de raştî kî ma tewr ju game zere ra nêeşte teber. Heya, beno ke tayê çî ameyê organîzekerdene, la şenik ê û gere kampanyayê hewlî biamêne organîzekerdene ke wa veng bivetêne.

Ewro tayê kesê ke çimê mi de ponc pereyî nêkenê, la hona derheqê kurdan û derheqê HDP de fikrê xo, rexneyê xo rehet-rehet vanê û çi hekmet a ke kes nê kesê ke ponc pereyî nêkenê, nê zatan ra çîyê nêvano. Mesele ke bîye birêz Demîrtaş, herkes çîyê vano. Na raşte nîya.

Naye kî her kes rind bizano, birêz Demîrtaş xizmetkarê mucadelaya demokrasî yo. Mi ra gore ana esna de kes cayê Birêz Demîrtaşî pirr nêkeno. Mordemê aştî yo. Xizmetê ke ey seba aştîye û biratîye kerd, zobîna kesî nêkerde. Ewro kî dişmenî dest de rehîn o. Gere ma kî seba azadîya birêz Demîrtaşî û seba jubîyena miletê xo mucadele bikerîme û zere û can ra bixebetîme.

Helbet zereyê HDP de her kes fikrê xo, rexneyê xo, pêşnîyazê xo eşkera-eşkera bîyaro ra zon û vaco, la kes firsend medo nêheqan. Çunke nêheqî wazenê fîtne û fasadîye zereyê partîya HDP û werteyê wekîlanê HDP kerê. Naye ra gore gere her kes sîyasetêde hewl û mucadeleyêda bêqusurê bikero.

Ma na roja tenge de leweyê Demîrtaşî de bîme.

Ewro dewleta Tirkîya birêz Demîrtaş rehîn gureto. Dest û payê Demîrtaşî girêdayî yê û nêşîkîno çîyê bikero. Helbet o kî derheqê HDP de fikr û ramanê xo, rexne û pêşnîyazê xo nusneno û henî ano ra zon, vano. No mordemek heşt serrî serekê HDP bî û nêzan çand serrî yo kî zereyê partîye de sîyasetêde aktîf kerd. E, ma no mordemek ke derheqê  partîya xo de fikr û ramanê xo, rexne û pêşnîyazê xo ke mevaco, hona kam vaco?

Raşta kî birêz Selahadîn Demîrtaş naye qet heq nêkeno! Vatena xo oncîya vana, birêz Demîrtaş mordemê roja teng o û omidê bêkesan o. Mordemê aştî yo. O hertim leweyê mazluman, leweyê bêkesan, leweyê feqîr û fuqareyî de bî. Ewro kî ey seba miletê xo canê xo feda kerdo û hepisxaneyê kamaxê Edîrne yê tîpê F de rehîn o. Ma kî gere na roja tenge de leweyê Birêz Demîrtaşî de bîme.

CEWAB BIDE

Keremê xo ra şîroveyê xo binuse
Keremê xo ra nameyê xo binuse