Bîblîyografyaya Kirmanckî (Zazakî), 1963-2017, ke hetê Mutlu Canî ra sey xebata tezê masterî amebî amadekerdene, hetê weşanxaneyê Vateyî ra sey kitabî ame weşanayene. Seke yeno zanayene, kirmanckî de hetanî nika çend meqaleyan ra teber no war de xebatêka xosere nêamebîye kerdene. Ancîna xebatê bîblîyografyayî xusûsen seba akademîsyan û xebatkaranê şexsîyan çimeyê sereke yê. Na bîblîyografyaya pêroyîya ke hîrê serrî de qedîya do talîya nê warê kirmanckî pirr bikero. Nuştoxê nê kitabî vanê “Êdî yew bîblîyografya kirmanckî kî esta! Wa kirmanckî û kirmancan rê bixeyr bo!”

Şima do cêr ra nuşteyê pêşkeşî yê kitabî biwanê:

Pêşkêşî 

Yeno zanayene ke kirmanckî (zazakî) mîyanê lehçeyanê kurdkî ra aya ke tewr erey ameya nuştene. Serra 1963î (Rojnameyê Roja Neweyî) sey mîladê nusîyayîşê aye yê dewrê modernî bero qebulkerdene zî bingeyê edebîyatê kirmanckî pê kovara Tîrêjî ke serra 1979î de dest bi weşanê xo kerdo, ronîyayo. Awanbîyayîşê Grûba Xebate ya Vateyî ra pey (Swêd, 1996) lîteraturê nuştekî yê kirmanckî vera-vera aver şîyo, wendox û nuştoxê kirmanckî nîsbeten zîyade bîyî. Herçiqas ke kirmanckî hema zî cuya xo şertanê zaf negatîfan de domnena zî, ma êdî eşkenê vajîn ke kirmanckî wayîrê pêserîyêda nuştekî ya. Na xebata ke xo rê kerdo hedef ke na pêserîya ke hetê bêj û mîqdarî ra zîyade bîya pêşkêşê ewro û neslanê ameyoxan bikero, hîrê beşan ser o awan bîya. Beşê yewinî de derheqê bîblîyografya, bêjanê aye û bîblîyografyayanê kurdan de melumatî estê. Beşê dîyinî de sernuşte û kunyeyê 332 kitabanê ke goreyê tewirane xo tesnîf bîyê estê. Beşê hîrêyinî de zî sernuşte û kunyayê 5998 metnanê weşananê perîyodîkan ke goreyê tewiranê xo tesnîf bîyê ca gênê. Hûmara pêroyê kunyeyanê bîblîyografîkan 6330 a.

CEWAB BIDE

Keremê xo ra şîroveyê xo binuse
Keremê xo ra nameyê xo binuse