Destê Edîtorî ra


Newroze ameya, newroza bimbareke. Newroze kulturê ma de cayêde tewr muhîm gêna,  roşanê nasnameyê ma yo. Newroze şayî ya, reqis o, govend a. La heto bîn ra nê rojê ma rojê giran ê. Nêm serr a ke Kerkûk û parçeyê bînî yê Kurdîstanê Başûrî binê hukmê dişmenî der ê, Kurdîstanê Rojawanî û Efrîn na wo îşgal beno, bi seyan kurdî welatê xo ra remenê, ma hezar şehîdî dayî. Coka xeylê kesî xo ra persenê: ma çinayî rê newroze pîroz bikerîme? Nika wextê şên û şayî ya?

Tabî gerek her kes cewabê ney xo rê bivîno. Labelê ma yew çîyî xo vîr ra mekerîme: manaya newroze. Newroze sey roşananê bînan nîya, newroze sembolê azadî û xoverrodayîşî yo. Senî ke Kawayê asinkarî sereyê Dehakê zalimî birnayo û şarê xo kerdo azad, ma kî henî mucadeleyê xo ra dewam kenîme. Ewro Dehakê ma zaf ê, dormeyê ma girewto. Wexto ke îşgalkerî kewtî merkezê Efrînî, verê veran heykelê Kawayî rijna. Qey? Çike ê ma ra tersenê. Tersenê ke ma kî sey Kawa xo ver ro dîme û xo zalimanê xo ra azad bikerîme. Coka şehîdê ma yê ke canê xo feda kerdî, seba azadî û nasnameyê xo feda kerdî.

Dişmenê kurdan Efrîn de heykelê Kawayê asinkarî rijnenê (Resim: ANF).

No sebeb ra muhîm o ke ma sereyê xo berz û zerrîya xo şa bikerîme, ma fedakarîya înan rê hurmet bikerîme. Halê ma çiqas yaman bo, gerek ma dinya û dişmenanê xo rê mesajê newroze bimusnîme. Bimusnîme ke ma çin nêbenîme, ke adirê ma wenêşono, ke ruhê Kawayî hîna ciwîyeno. Newroze ameyîşê wisarî yo, neweracandarbîyayîş o, destpêko newe yo. Hewesê azadî yo, eşq û hêvî yo. Eke ma destûr danîme ke naye ma ra bigêrê, ma çinayî rê da pêro? Bê newroze Kurdîstan nêbeno, Kirmancîya nêbena. Eke ma newroze caverdanîme, ma xo caverdanîme û dişmenî, Dehakê zalimî, kewenê ser. Coka emser hîna zaf bibê newroze, bibê adirê azadî, aştî û xoverrodayîşî. Bibê hêvîya şarê ma ke çilaya newroze nesl bi nesl webo!

Bi nê qisayan, ma sey ekîbê DêrsimInfoyî newroza şima pêrune bimbarek kenîme. Bimanê weşîye de.

CEWAB BIDE

Keremê xo ra şîroveyê xo binuse
Keremê xo ra nameyê xo binuse