Keyepel Nuştoxî ra Berlîn de şewa kulturî

Berlîn de şewa kulturî

258
0

Berlîn de şewa kulturî organîze bîye. Na şewa kulturî hetê tayê hevalanê hêcayan ra organîze bîbî.  Roja 26.01.2013 edi tîyatroyê Berlînî Tîyatrom de saeta 20:00 de dest bi programê şewe bî. Dest pêkerdena şewe de Kamer Soylemezî derheqê kar û hunerê xo de bi kilmek qesey kerd û CD û kitabê ke newe neşr bîyê, miletî rê ju bi ju day nas kerdene.

Na nas kerdena kitaban û CDyan ra dime Mikaîl Aslan û Cemîl Qoçgîri dest bi muzîkî kerd. Na şewe de hîrê hunermendî, hîrê senatkaranê hêcayan, yanî Mikaîl Aslan, Kamer Soylemez û Cemîl Qoçgîrî sahne gurete. Kamer Soylemezî bi wendena çand şîîranê xo, Mikail Aslan û Cemîl Qoçgirî kî bi hunerê xo, bi sanata xo, bi muzîkê xo reng û veng da şewe. Yanî bi na wesîle nîyadayox û goşdaranê hêcayan şewêda zaf rinde derbaz kerde.

Nê hîrê hunermendan sanata xo bi enstrumananê xo, bi muzîkê xo, bi zon û kulturê xo îcra kerde û arde mîyan. Nîyadayoxan kî peynîya programî de nê hîrê hunermendî lingan ser o bi pirodayena çepikanê xo kerdî şad.

Standê kitab û CDyan de eleqeyêda zaf rinde bîye. Ne tewrîkê kulturî de kitabê ke Kamer Soylemez û Eren Kiliçî seba domanan kerdê hazir, “ABC ma”, “Heywanê ma”, “Hacetî û Qavî”, “Zarzawet û Yemiş” û CDya ke Kamer Soylemezî tede helbestê kirmanckî (zazakî) wendê, yanî CDya bi nameyê “PEYA” û ju kî tîşorta ke ser o bi hîrê zonan amo nuştene, stand de ca guretîbî. Bê nînan, oncîya CDya Cemîl Qoçgirî “Hîva Zerî” û kitabê Mikaîl Aslanî yo “Kilamê Çemî” (no kitab bi nota muzîkî amo amade kerdene) hetê miletî ra zaf eleqêda rinde dîye.

Seba ke no xizmetê kulturî biresnê şarê xo û şarê xo de pare kerê, înan kî heqbê xo, yanê tewrîkê xo eşto ra vilê xo û kewtê ray û dirban welat bi welat, şaristan bi şarisan nîya cêrenê.

PARE BIKE
Wusênê Gestemerde
Wusênê Gestemerde serra 1971 de dewa Gimgimî Gestemerde de ameyo rîyê dinya. Serra 1990 ra nat Ewropa der o. Endamê Înstîtutê Ziwan û Kulturê Kirmancî (Zaza) ÎKK e.V. Berlînî yo û demê kî karê Komîteya Rayeraberdîşê Înstîtutî de bi hevalanê xo aktîf xebitîya. Serra 2000 ra nat ziwan û kulturê xo ser o xebitîno û bi kirmanckî (zazakî) meqale, hîkaye û şîîran nuseno. 2012 de Gestemerdeyî Xelata Edebîyatî ya Huseyîn Çelebî girewte.

CEWAB BIDE

Please enter your comment!
Please enter your name here