Serekê Herêma Kurdîstanî Mesûd Barzanî 20 deqayî bi wezîrê karanê teberî yê DYA John Kerry de ame têlewe ke îstîqbalê Îraqî ser o qisey bikerê. Melumatan ra gore Barzanî da zanayene ke nika Îraq de rastîya newîye esta: kurdî xoserîye wazenê.

Eslê xo de Kerry ame Hewlêr ke kurdan seba awankerdişê hukmatêde newe yê Îraqî îkna bikero, seba ke welat binê tehdîdê DÎÎŞ de hurdî-hurdî parçe beno. Cewabê Barzanî o bî ke êdî sîyaseto kan vurîya, va ke “Nika ma bi rastîyêda newîye, Îraqo newe de têrî yîme.”

Herçiqas ke hukmatê Herêma Kurdîstanî ricaya DYA ke kurdî bibê beşdarê hukmatê neweyî yê Bexdadî, red nêkerd, Barzanî da zanayene ke gerek no goreyê şertanê kurdan peyda bibo. Çi esto ke serekwezîrê Îraqî Nurî Al-Malîkî vurnayîşê hukmatî rê xeyrwaz nêasa. Zîyaretê Kerry Herêma Kurdîstanî de musneno ke îstîqbalê Îraqî de qisaya kurdan giran a. Keyepelê serekîya Herême ra gore, kurdan DYA ra va ke ê êdî Bexdad rê vileyê xo çewt nêkenê.

PDK ra qederî wezîrê partîyanê YNK û Gorranî kî bi John Kerry kom bîy. Partîyanê başûrî têfek ra da zanayene ke ê duştê terorîzmî de danê pêro, labelê nêwazenê ke beşdarê cengê mezheban ê Îraqî bibê.

Aye ra teber Mesûd Barzanî bi kanalê televîzyonî yê DYA CNN de yew roportaj kerd. Roportajê xo de Barzanî va ke seba kurdan nika wext wextê tayînkerdişê qederê xo yo. Barzanî: “Nê serebûtanê peyênan ra dime wext ame ke Îraq de kurd qederê xo bi xo tayîn bikerê. Ma do goreyê waştiş û qerarê şarê xo hereket bikerîme.” Derheqê rewşa Kerkûkî de kî Barzanî da zanayene ke “Kerkûk no taw binê kontrolê artêşa kurdan der o, çike tarîx de şaristan hertim kurd bî. Gerek no derheq de netîceyê referandumî bêro qebul kerdene.”