Roje bi roje kirdkîya (kirmanckîya) ma aver şina, xurt bena û kêmîya xo temam kena. Tîya ra çend serrî verû cû dezgeyanê kitabroşan de ne hende kitabê ma bibîyî, mîyanê kovaran de ne hende kovarê ma bibîyî, ne hende rojnameyê ma bibîyî û – o zaf muhîm – ne zî yew televîzîyonê ma bibi. La ewro hende xurt nêbê zî, hema-hema her çîyê ma, kitabê ma, kovarê ma û rojnameyê ma estî û yew televîzyonê ma zî esto. Welhasil vera-vera sey şaranê bînan êdî çîyê ma yê nuştekî zî zêdîyenî.

Kişta nê çîyanê ma de wendox û nuştoxanê ma de zî yew zîyadebîyayîş aseno. Hema-hema her mintaqaya ma kirdan de nuştoxî vejîyayê. O hîna zaf balkêş zî zîndanan ra nuştoxê ma roje bir roje zêdîyenê.

pÊ Jîyan TV no averşîyayîş qat bi qat mesafe girewt

Seba ke hûmara wendox û nuştoxanê ma tay bizêdîyo û seba ke kirdkîya ma tay aver şêro, hema çend serrî verû cû ma heme zor dayêne xo kursan akerdêne û. Herçiqas nê kursî hema zî KURDÎ-DER de dewam bibê zî, sey çend serrî verû cû hende tesîrê xo û rojanebîyayîşê xo nêmendo.

Badê ke Unîversîteya Artuklî ya Mêrdînî bi tewrêko aktîf dest eşt ziwanê kurdkî, kirdkî zî na xebate ra îstîfade kerde. Bi wasitaya na unîversîte zî hûmara wendox û nuştoxanê ma aver şîye.

La badê ke Jîyan TV abi û dest bi weşanayîşî kerd, no averşîyayîş qat bi qat mesafe girewt. No averşîyayîş de ganî ma Zarok TV zî xo vîr ra nêkerê. Herçiqas ke hûmara temaşekerdoxan goreyê zerrîya ma nêbo zî, reyna faydeyê xo esto.

Belkî destê ma de yew statîstîk çin bo, labelê roja ke Jîyan TV dest bi weşanayîşê xo kerd hetanî ewro rasta zî yew vurîyayîşo zelal aseno.

Eke ma îmkan bidîyêne û ma bi awayêko musbet hetanî 21. adara serra 2016î sewîya kirdkî tesbît bikerdêne, ma do ewro tesîrê Jîyan TV hîna hol fehm bikerdêne. Labelê no îmkan çinê bo zî, reyna merdim eşkeno nê warî de mîyanê şarê xo de bi yew cigêrayîş nê tesbîtî vejo meydan.

tu kes sey verê cû hende huşk nêfikirîyeno

Ez wazena tena yew çîyo ke bala mi anceno, bi şima wendoxan reyde pare bikerî. Şima zanenê nê çend serrî yê ke ma heme konferans, panel û kombîyayîşan de behsa kirdkîya mintiqayan kenê. Behsa kirdkîya mintiqayan kenê û ma vanê kirdkîya her cayî seyyewbînî nîya. La çi heyf ke ma kerdêne-nêkerdêne şarê xo îqna nêkerdêne û her kes kirdkîya dewa xo kirdkîya mintiqaya xo rast vînayêne.

La badê ke no televîzîyon dest bi weşanayîşî kerd, nê warî de fikrê şarê ma zî hêdî-hêdî vurîya. Beno ke tayê kesî sey verê cû reyna kirdkîya mintiqaya xo rast bivînê, labelê ez bawer a ke tu kes sey verê cû hende huşk nêfikirîyeno.

Ewro badê ke şar programê Çewlîg ra, Tanîya Adirî, Dêrsîmî ra û programo ke Sêwreg de virazîyeno Veng û Reng goştarî keno, ez vana qey êdî nêeşkeno vajo kirdkî tena yê mintiqaya min a û kirdkîya mintiqaya mi rast a. Yanî, bi wasitaya Jîyan TV na rastîye îsbat bîye.

şar êdî nêeşkeno vajo Tena kirdkîya mintiqaya mi rast a.

Heto bîn ra şarê ma êdî bi nê programan vera-vera kirdkîya yewbînan ra zî fehm keno. Şaro çewligij kirdkîya Dêrsîm û Sêwregî ra, yê Dêrsim û Sêwregî zî kirdkîya Çewligî ra fehm kenê.

Ganî Jîyan TV nê programan derg bikero û programê bi nê şeklî bizêdêno. Bi nê programan hem kirdkîya ma vera-vera standard bena û şarê ma zî vera-vera kirdkîya heme mintiqayan ra agahdar beno.

PARE BIKE
Mehmud Nêşite
Mehmud Nêşite 1945 de dewa Xosorî, qezaya Licê, bajarê Dîyarbekirî de ameyo dinya. 1963 de bîyo mamoste. 30 serrî tayê bajaranê Tirkîya û Kurdîstanî de mamostayîye kerde. 1994 de teqawut bîyo. Nêşite 1980 de surgun bîyo, nika Dîyarbekir de ciwîyeno. Bi kirmanckî hîkaye û meqaleyan nuseno û endamê Grûba Xebate ya Vateyî yo.

CEWAB BIDE

Please enter your comment!
Please enter your name here