Par maçê kalîfîkasyonê kupayê Ewropa yê futbolî de ekîbo almano milî Berlîn de duştê ekîbê Tirkîya de kotîbî ser. Na fay, şewa îne de dorê 50.000 heyrananê futbolî Îstanbul de cayê xo girewto û qayîtê maçê rovanşî yê ekîbê almanî û tirkî kerd. Hesabê ekîbê Tirkîya ra gore înan cayo dîyin bigirewtêne, eke ser kotêne. Labelê hem ekîbê tirkan bi 3:1 kot bin, hem kî maço bîn ê grûba A de Belçîka duştê Qezaxîstanî de netîceyê 4:1 girewt. Bi no skor ra Belçîka 15 pûanan ra cayo dîyon ê grûbe cêna, Tirkîya kî bi 14 pûanan cayo hîrêyin der a. Roja dişemîye Belçîka duştê Almanya de kay kena. Belçîka ke no maç xo rê cêna, ekîbê Tirkîya Kupayê Ewropa de teber ra manena.

Estareyanê ekîbê Almanya Mesut Ozîl û Mîroslav Kloseyî no maç de kay nêkerd. Deqaya 35. de paso derg ê Holger Badstuberî seba goleştoxê almanî Gomezî raye kerde ra û nîya bi şuto berz durim bî 1:0 seba ekîbê milî yê Almanya. Ey ra tepîya futbolbazo bîn ê Bavyera Munîhî Thomas Mullerî deqaya 66. de golo dîyin eşt. No gol ra dime ekîbê almanan giran kay kerd, seyrkerdoxan dî ke almanan waşt ke skor nîya verdê. O taw de futbolbazê tirkî Hakan Balta deqaya 79. de skor kerd 2:1. Ekîbê Tirkîya ceribna ke kay bicêro xo dest, labelê almanan destûr nêda. Deqaya 86. de kî xeyrê penaltî û şutê Schweînsteîgerî ra teselîya ekîb û heyranê tirkan temamen kote, xeylê seyrkerdoxan stad rew terk kerdîbî. Maçê 07.10.2011 kî bi netîceyê 3:1 seba Almanya qedîya.

(Resim: kaddyyy)

CEWAB BIDE

Keremê xo ra şîroveyê xo binuse
Keremê xo ra nameyê xo binuse