Roja 21.12.2013 saeta 19.30 de qezaya Kadîkoyî yê Îstanbulî de komela AKA-DERî yew çalakîye viraşte. Na çalekîye de Denîz Gunduzî kirmanckî ser o qisey kerd.

AKA-DER “Anadolu Kültür Araştırma Derneği” (Komela Cigêrayîşê Kulturî yê Anatolîyî) ziwan û kultur ser o xebate kena û seba ke kultur û ziwan aver şêro, kursan akena. Serra 2008î de ronîyaya. Ewro na komele de kursê kirmanckî, kurmanckî, lazkî, armenîkî, sûryanîkî ûsn. abîy.

Kursê kirmanckî Mamosta Nurulah dano. Nurulah her hewte yew roje yeno û na komele de hîrê saetî kurs dano. Nika pancîyês kursîyerê kirmanckî kurs vînenê.

Komele na roje de zî çarçewaya xebata xo de yew çalekî  viraşte. Programî nê çalekîye de konferans û şayî bibî. Konferans kirmanckî ser o bi.

Verê, konferans dest pêkerd. Nê konferansî de qiseykerdox Denîz Gunduz bi. Komele ra di hebî kênayî bi kirmanckî xeyrameyîş kerd. Dima Denîz Gunduz dest bi qiseykerdişî kerd. Denîzî derheqê kirmanckî de derg û dila qiseykerdişêk pêşkêş kerd.

Denîzî cayê ke kirmancî tede ciwîyenê, cografyaya înan, ewro sewîyeya kirmanckîya nuştekî û edebîyatê kirmanckî ser o qiseykerdişê xo temam kerd. Dima sey heme konferansan persî persîyê. Nê demî de munaqeşayêka samîmî virazîya. Zaf goştaritoxî beşdarê nê munaqeşeyî bîy.

Nê kombîyayîşî de çend merdimê emrinî bibê zî labelê zafê goştaritoxan ciwanî bî û wendekarê unîversîteyan bî. Cîwanî zî tirk, laz, kurmanc û kirmancî bî. Nê sedemî ra qiseykerdiş û munaqeşeyî bi tirkî bi.

Konferansî ra dima çalekîya muzîkî dest pêkerde. Çalekî hetanî ereyê şewe dewam kerde.

CEWAB BIDE

Keremê xo ra şîroveyê xo binuse
Keremê xo ra nameyê xo binuse