Yaşar Kemalî vatbî “Ma do yew ziwan vînenî, o ziwan reseno her çî, o ziwan vano. Ma do na dinya de wina bêziwan, wina sey dişmenan, wina pare-pare nêgêrênî.”  

2016 hol-xirab vîyart. Emser zî tarî roşnayî ra, xem û kul şênayî ra zaf bî. Bajaranê ma de ser ra ser yew bêvengîya derge ma pêro pîya na bêvengî de pawit, ma qal nêkerd labelê ma çîyekî zî xo vîr ra nêkerd, ma xo vîr ra nêkenî. Merdim û heyat rey-rey sey yew sanike yî. No merdim mîyanê xirbeyan de zî xo rê yew ban virazeno mesela. Mîrçikî tewr zaf xirbeyan de veng nêdane? Mesela nê xirbeyan ra vengê mîrçikan zî yeno. Birîna merdim beno nasnameyî, uca ra newe ra yeno dinya, weleyê xo ra, newe ra. Aye ra Sîmurgê Anqa seba nê erdan teyna yew mîrçike sanikan nîya. Zereyê na xirabî de çîyê rindekî zî benî aye ra, tay ê, labelê benî.

ma xo vîr ra nêkenî

2016 de seba ziwan û kulturê zazakî ser xebatî virazîyê. Ez wazena tîya de înan ra hewt çîyanê rindekan şima ra zî vajî:

Mi yew şan Jîyan TV de Malmîsanij dî. Malmîsanij û Mutlu Can qal kerdêne, sankî ez bineyke hêrs bîya, labelê ez zaf-zaf bîya şa. Malmîsanij vîrê ziwanî ma yo, ez sewbîna se vajî! Ma no hamnan arayî de timûtim Jîyan TV temaşa kerd, şamî de û vêşanî de zî. Jîyan TV ame padayîş. Ma yew rey viraşt, dinya elem zî dî, ma eşkenî hewna virazî!

Emser qic ra pîl her kes Bawo vat, şoforî erebeyan xo de Bawo cinit, ziwanê domanan de “Bawo, Bawoo, Bawooo…” Kerem Sevînçî pê albuma xo Dejî muzîkê kurdî de yew cayo muhîm girewt.

Mava Dêrsim ra yew grûba newe ya. Albuma Mava Tew no hamnan vejîya. Album ra ca-ca boya Flamenko zî yena. Ecêba zazayî û spanîyî…

Cemîl Qoçgîrî pê Zalâl ame. Qeseyê deyîran de nameyê Dogan Munzurogluyî esto, qeydê de Cemîl Qoçgîrî. Album sey nameyê xo zelal û pak o.

Aynur û Kayhan Kalhor, Mikaîl Aslan û Erkan Ogur, Sakîna û Trîo Mara pîya, Mehmet Atli zî teyna konseran de bîyî û pêro zaf rind bî.

Ma yew rey viraşt, ma eşkenî hewna virazî!

Mi reyna Binê Dara Valêre de wend. Mi reyna fehm kerd ke no kitab mîyanê hamnanî de sey versîya yew gozêre yo. Roşan Lezgîn kek ma yo rindek o!

Emser zî emegê Roşan Lezgîn û Bîlal Zîlanî dewam kerd. Rojnamayê Newepelî her aşme vejîya, Weşanxaneyê Roşna ra zî kitabê zazakî yê newe vejîyayî. Eywallah!

Hinî yew kovara ma ya newe esto. Ewro 2016 de ameyo dinya, wa zaf biciwîyo! Ewro sey Vate û Şewçila seraser zazakî yo. Kovara Ewroyî de teorîyê edebîyat û ziwanî ser meqaleyî estî. Ewro rîpelan’ xo de ca nêdano şîîre û hîkaye, her hûmare de yew mewzû ser dosya keno hedre. Ma tîya de nameyî çend nuştoxî Ewroyî zî vaje: Abdullah Çelîk, Newzat Valêrî, Ugur Sermîyan, Pinar Yildiz, Esat Şanli.

The Smurfs (Kewelokî / Şînok) Zarok TV de zazakî qisey kerd. No hal tayê Gargamelan rê bî derd, waşt ke vengê şîrînan bîbirnî. Domananê ma dewê xo nêdanê Gargamelan, inî zî wa wina bizanî.

Çekuyê Vateyî seba ma yew destpêkerdişî îşaret keno. Zafîyê ma zazakîyî serê kaxite de reya verêne ew kovare de dî. Lîse de yew mamosta na kovareyî da mi. Verê mi çik fehm nêkerdîbî, wexto ke mi reyna-reyna wend, mi va “Temam, no ziwanê ma yo.” Ez wazena seba Vate û Grûba Xebate ya Vateyî vajî Yew hereketo xoverdayîş a.Emser zî hûmara 50. ya Vateyî vejîyaye. Hem seba pîrozkerdişê hûmara 50. ya Vateyî hem zî seba berzkerdişê qedr û qîymetê nuştişê zazakî, Grûba Xebate ya Vateyî kombîyayîşê xo de qerar da ke yew musabeqaya hîkaye û şîîranê zazakî organîze bika. Bimbarek bo!

Temam, no ziwanê ma yo.

Seba qirkerdişê Dêrsimî zaf çî ameyî vatiş, zaf çî nusîya. Emser Kalan | Z Muzîk ra yew karê etnomuzîkolojî ye muhîm vejîya: Tertele. Nîlufer Saltik û Cemal Taş Terteleyî 4 serrî de kerd hedre, 25 serrî ra nat zî fotograf û ewraqî ardî pesêr. Na xebate de şima eşkenî tarîyê qirkerdişî bivînî.

Hepisxaneyan ra vengê Murad Canşad û Huseyîn Karakaşî ameyî. Şima çend rind î, çend azad î! Sodirê şima bixeyr, silam bo!

Medyayê sosyalî û înternet de zî xebatî weş virazîyê, emser. Ma nê embazî zî xo vîr mekerê: zazaki.net, dersiminfo.com, kirdki.com, Luye, Perwerdîa… Destê şima zergûn bê!

Ez omid kena ke ma pê zazakî 2017 de zî xebatî rindekan virazenî. Ew ziwano ke Yaşar Kemal vano ganî ma bivînî, sewbîna yew çare çin o çunke.

PARE BIKE
Hesen Polat
Hesen Polat serra 1988 de Çewlîg de ameyo dinya. Anqara de edebîyat wend. Polatî serra 2010 de Musabeqaya Hîkaye û Şîîranê Huseyîn Çelebî de û serra 2013 de Musabeqaya Hîkayeya Abdullah Duranî de xelata yewine girewte.

3 ŞÎROVEYÎ

  1. Deste sima tern bo Hesen Polat, sima raversiyayise zone mayo serra 2016 rind are kerdo. Serra simaye neweye simare u sare Kurdistan re bimbarek bo!

  2. Birêz Hesen Polat, seba nuşte ez to re zaf sipas kena, ziwane to zaf sade û edebî yo, weş o. Labele nuşte de to yew çî xo vir kerd. 2016 de yew roman vejiyo. Romanê Nadîre Guntaş Aldatmaz, Pîltane. No roman destê yew cinî ra nusiyo, no semed ra romano verênê ma ya kirmancano. Mi gore çîyê tewr rindekî 2016 no yo. Zaf selamî, weş û war be.

CEWAB BIDE

Please enter your comment!
Please enter your name here