Roja îne, 20. adare 2015 de, vakurê dinya de roj yeno girewtene. Eke şertê hewayî rind o, tayê Kurdîstan ra kî yeno dîyene.

Cêrîyayîşê rojî do bi temamîya xo hetê Skandînaya de bêro dîyene. Vakurê atlantîkî de mintiqaya 400 km do seba 1-2 saetî tarî bo, bitaybetî Faroarna û girawanê Spîtsbergenî yê Norweçî de. Ewropa de roj mabênê %60-82 de yeno girewtene. Kurdîstan de tena %40 yê roj cêrîno. Normal de, tena eke roj %90 ra zêde bêro girewtene, a game merdim ferq keno. Coka roja îne de, cêrîyayîş do sey rojêda hewrine biaso.

Cêrîyayîş Kurdîstanê Vakurî de saeta 10:50 ra dest keno ci û heta 13:00 şono. Labelê gerek meraqdar û qayîtkerdoxî diqet bikerê. Bê verçimikê taybetî qayîtkerdiş zerarêde girs dano çiman. Gerek merdim bi çimêde rut ra qayîtê cêrîyayîşî nêkero. Eke xo het de verçimikî ûsn. çin ê kî, însan pê fîlmê rontgenî yan camêde sîya besekeno qayîtê ci bikero. Qayîtkerdiş di-hîrê sanîyeyan ra zêde nêbo. Nêke, çimî zerarêde girs cênê, îhtîmalêde tewr xirab de kî merdim beno kor.